«Հայաստանը վաղուց դուրս է եկել միայն «տարածաշրջանային» դերակատար լինելու տրամաբանությունից». Արման Բաբաջանյան

ԱԺ նախկին պատգամավոր Արման Բաբաջանյանի գրառումը. «Տխրահռչակ ռեգիոնալիստներին պետք է հուշել՝ պետություն, որը չի գիտակցում իր տեղն ու դերը միջազգային հարաբերությունների համակարգում, արդեն իսկ կորցնում է իր ինքնիշխանությունը։
Սա, ըստ էության, քաղաքական երկակիություն է, որը ոչ միայն վնասում է Հայաստանի արտաքին դիրքերին, այլև քաղաքական թիմի ներսում ստեղծում է խեղաթյուրված ընկալումներ։ Եթե այսօր իշխանության որոշ ներկայացուցիչներ դեռ չեն գիտակցում, որ Հայաստանը արդեն վերանայում է իր աշխարհաքաղաքական դիրքավորումը, ապա սա ոչ թե կեղծ ռեալպոլիտիկ է, այլ քաղաքական կարճատեսություն։
Հայաստանը վաղուց դուրս է եկել միայն «տարածաշրջանային» դերակատար լինելու տրամաբանությունից։ Տարածաշրջանային անվտանգության համակարգերը փլուզվել են, Ռուսաստանը այլևս չի կարող ապահովել նույնիսկ այն նվազագույն բալանսը, որի պատրանքն ուներ, իսկ Արևմուտքը, ի տարբերություն նախորդ տասնամյակի, պատրաստ է ավելի մեծ ներգրավվածության։
Եթե այս ամենի ֆոնին իշխանական քաղաքական թիմի ներսում դեռ կան մարդիկ, ովքեր հավատում են, որ վեկտոր չենք փոխում, ապա կամ չեն հասկանում ընթացող գործընթացները, կամ զբաղված են քաղաքական հարմարվողականությամբ։ Երկու դեպքում էլ դա լրջագույն խնդիր է։
Խնդիրը այն չէ, որ Հայաստանը չունի այլընտրանք, այլ այն, որ Հայաստանը չունի այլընտրանքային ժամանակ։ Այսպիսի լճացված մտածողությունը, որն արհեստականորեն Հայաստանը պահում է «ակվարիումի» տրամաբանության մեջ, միայն ավելացնում է ճնշումները երկրի վրա և հետաձգում անխուսափելի որոշումները։ Պետական կառավարման մեջ այսպիսի անորոշությունը ոչ թե զուտ թերացում է, այլ ռազմավարական անպատասխանատվություն։
Բայց իրականությունը չի սպասելու, մինչև իրենց թիմակիցները հասկանան, թե ինչ է իրականում տեղի ունենում։ Երբ իրականությունն է բացատրում, սովորաբար գինը շատ ավելի բարձր է լինում»: