«Քրեական ենթամշակույթ կրողի կարգավիճակ ունենալը կդիտարկվի որպես քրեական պատասխանատվության առարկա»․ Արփինե Սարգսյան

«Քրեական ենթամշակույթի դեմ տարվող պայքարը ձախողվում է՝ դատաիրավական համակարգի որոշ ներկայացուցիչների ոչ բավարար ջանքերի կամ կաշկանդվածության պատճառով։ Խոսքը չի վերաբերում միայն օրենքով գողերին կամ հանցավոր հեղինակություններին»,- ԱԺ-կառավարություն հարցուպատասխանի ժամանակ դիմելով ՆԳ նախարար Արփինե Սարգսյանին, այս մասին նշեց ՔՊ խմբակցության պատգամավոր Հայկ Սարգսյանը։

Պատգամավորը հետաքրքրվեց, թե՝ ինչ աշխատանք է տարվում քրեական ենթամշակույթը մեր քաղաքացիների միջից արմատախիլ անելու համար։

Արփինե Սարգսյանը պաասխանեց՝ ընդգծելով, որ քրեական ենթամշակույթին վերաբերող օրենսդրական կարգավորման մեջ պետք է կատարեն փոփոխություններ, որպեսզի կարողանան կարգավիճակ ունենալը դիտարկել քրեական պատասխանատվության ենթակա։

«Այսօր քրեական պատասխանատվություն է նախատեսված կարգավիճակ տալու, ստանալու, պահպանելու համար, սակայն կարգավիճակի գոյությունը չի դիտարկվում որպես քրեական պատասխանատվություն։

Այս պահին վարչապետի հանձնարարականով մշակված է համապատասխան օրենսդրական նախաձեռնություն, որն առաջիկա օրերին կհանրայնացվի, որով կարգավիճակ ունենալն ինքնին կդիտարկվի որպես քրեական պատասխանատվության առարկա։ Սրանով կկարողանանք որոշակի առումով փոփոխություն մտցնել պրակտիկայում»,- նշեց ՆԳ նախարարը։