«Հայ-ադրբեջանական թեման կարծես թե միջազգային «պահանջարկ» չունի»․ Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը․ «Նիկոլ Փաշինյանը Մյունխենում է, որտեղ կայանում է անվտանգության ամենամյա համաժողովը:

Ի տարբերություն նախորդ տարվա, այս տարի կարծես թե խոսք չկա Փաշինյան-Ալիև հանդիպման հնարավորության մասին: Նախորդ տարի, հիշեցնեմ, Գերմանիայի կանցլերի նախաձեռնությամբ տեղի ունեցավ հանդիպում, որի ընթացքում կայացած պայմանավորվածության համաձայն էլ փետրվարի վերջին Գերմանիայում հանդիպեցին արտաքին գործերի նախարարները՝ Գերմանիայի ԱԳ նախարարի հովանու ներքո:

Այժմ սակայն, հայ-ադրբեջանական թեման կարծես թե չունի միջազգային «պահանջարկ»: Գոնե ակտիվ պահանջարկը այսօր այլ է, շատ ավելի խորքային հարցեր:

Սակայն, նախորդ տարի Մյունխենում տեղի ունեցած ամենից ուշագրավը թերևս նույնիսկ Փաշինյան-Ալիև հանդիպումը չէր, այլ Նիկոլ Փաշինյանի հանդիպումը բրիտանական հետախուզության ղեկավար Ռիչարդ Մուրի հետ:

Դա արտառոց ձևաչափ է, երբ միջազգային որևէ համաժողովի շրջանակում պետության դե ֆակտո առաջին դեմքը հանդիպում ունենա այլ պետության հետախուզական ծառայության ղեկավարի հետ: Այլ բան, եթե հետախուզության բարձրաստիճան պաշտոնյան ժամանի երկիր և արժանանա պետության ղեկավարի ընդունելության, բայց, երբ միջազգային համաժողովում կայանում է այդպիսի ձևաչափով հանդիպում, դա մեղմ ասած սովորական չէ:

Իսկ այս տարի Մյունխենում Նիկոլ Փաշինյանը կհանդիպի՞ Ռիչարդ Մուրին: Մուրը կայցելի՞ Մյունխեն:

Ի դեպ, դատելով Մյունխենի առաջին կադրերից, Փաշինյանի հետ է նաև Հայաստանի Արտաքին հետախուզական ծառայության ղեկավարը»