«Ուղերձը կարող է ռեգիոնալ տերությունների պահանջների «փափուկ» փաթեթավորումը լինել»․ Վիտալի Մանգասարյան

«Հենակետ» վերլուծական կենտրոնի ղեկավար Վիտալի Մանգասարյանի ֆեյսբուքյան գրառումը. «Նիկոլ Փաշինյանը հայտարարել է, որ գաղափարախոսական ուղերձով դիմելու է ժողովրդին։ Այդ հայտարարությունը, առաջին հայացքից, կարող է սովորական քաղաքական քայլ թվալ, բայց, երբ խորանում ենք դրա բովանդակության հնարավոր շրջանակների մեջ, հարցեր են առաջանում. ի՞նչ գաղափար կարող է ներկայացնել մի ղեկավար, ով մշտապես պնդել է, որ «իզմեր» չունի:
2018 թվականին իշխանության գալով՝ Փաշինյանը և իր թիմը ընդգծել են, որ իրենք չեն առաջնորդվում որևէ դասական գաղափարախոսությամբ՝ լինի դա սոցիալիզմ, լիբերալիզմ, ազգայնականություն, պահպանողականություն կամ այլ իզմ: Ավելին, իշխանության առաջին տարիներին հենց դա էր ներկայացվում որպես նրանց առավելությունը, իբր իրենք գործնական, ոչ թե տեսական ու գաղափարական խնդիրներ են լուծում:
Կարծում եմ, ՀՀ միջին վիջակագրական (վերջին շրջանում նույնիսկ հպարտ) քաղաքացիների մի մասը մտածում է, որ այս «գաղափարախոսական ուղերձը» մեծ հավանականությամբ կարող է լինել, Ադրբեջանից ու Թուրքիայից հնչող թեզերի հերթական ներկայացումը՝ արդեն հայկական շղարշով։
Վերջին տարիներին Հայաստանի ղեկավարը բազմիցս հանդես է եկել հայտարարություններով, որոնք զարմանալիորեն համընկնում են Ալիևի և Էրդողանի քարոզչական թեզերի հետ:
Այդ իսկ պատճառով, Փաշինյանի «գաղափարախոսական ուղերձը» կարող է լինել ռեգիոնալ տերությունների պահանջների «փափուկ» փաթեթավորումը:
Հայ ժողովուրդը հեծանիվ քշող, ձվածեղ սարքող, և փոդքաստ վարող վարչապետից ավելիին է արժանի։
Հայ ժողովուրդը պետականություն կերտող առաջնորդի կարիք ունի»։