«Ժողովրդի սթափեցումը մոտ է, և այս ձյունը հաղթելու խորհրդանիշ է»․ Նարինե Դիլբարյան

«88-ի փետրվարին էլ այսպիսի ձյուն էր գալիս․ ամեն ինչ ցույց է տալիս, որ մենք ելման շատ ավելի վատ կետում ենք, քան 88 թվականին․․․ Այսօր Բաքվում դատում են մի ամբողջ ժողովրդի, և Ռուբեն Վարդանյանի կոչը մեզ ոգեկոչում է ոտքի կանգնել։ Ես կարծում եմ՝ ճանապարհ է բացվում։ Ձյունը միշտ գալիս է, մաքրում է և բացում է այդ ճանապարհը»,- այս մասին այսօր նախատեսված հանրահավաքից առաջ լրագրողների հետ զրույցում նշեց լեզվաբան Նարինե Դիլբարյանը։

«Երեկ Նիկոլ Փաշինյանը հայտարարեց, որ ինքը պատրաստվում է փոխել Սահմանադրությունը, այսինքն, կարելի է ասել, որ դա վերջին զիջումներից էր Ալիևին՝ կատարելու նրա ամբողջ կամքը, և դա սթափեցնող պետք է լինի բոլորի համար։ Խոսելով հանրության լայն շրջանակների հետ, ես տեսնում եմ, որ այդ սթափեցումը գալիս է, և բոլորը արդեն կանգնում են այն խնդրի առաջ, որ նա ոչ թե փակում է ինչ-որ կեղծ Հայաստանի էջը, այլ փակում է ընդհանրապես Հայաստանի էջը։ Իսկ ֆիզիկայի կանոններից մենք գիտենք, որ երբ որ անկումը դառնում է բացարձակ, երբ որ զսպանակը գերսեղմվում է, հետո տեղի է ունենում բարձրացումը։ Եվ այս ձյունը հաղթելու խորհրդանիշ է»,- նշեց Դիլբարյանը։

Նշենք, որ «Միասին» այլընտրանքային հասարակական-քաղաքական շարժումն Ազատության հրապարակում անցկացնելու է հանրահավաք՝ հանուն 1988թ․ կամքի վերադարձի, հայկական ինքնության, ինքնիշխան պետության և իրական խաղաղության։