«Ընդամենը 1 մեքենա է եղել ամառային անվադողերով»․ ՆԳՆ

Երևանի քաղաքապետ Տիգրան Ավինյանն այսօր գործակարգավարական խորհրդակցության ժամանակ հայտնեց, որ առատ ձյան ժամանակ առաջացած խցանումների 80%-ն ամառային անվադողերով երթևեկելու և ԱՊՊԱ-ների հետևանքով է եղել։ Նրա խոսքով «իրար մի թեթև քսված մեքենաները ստիպված են եղել ժամերով սպասել», և որ ԱՊՊԱ համակարգը Երևանի համար աղետ է։
«Մեդիահաբ»-ը տվյալները ճշտելու նպատակով դիմել է ՆԳՆ-ին, թե քանի՞ վարչական արձանագրություն են կազմել այդ օրը ամառային անվադողերով երթևեկելու համար կամ որքանո՞վ է Ավինյանի ասած՝ այդ 80% թիվը համապատասխանում իրականությանը։

Ի պատասխան հարցմանը՝ ՆԳՆ-ից այսպիսի թվեր են տրամադրել․ «Փետրվարի 20-24-ը՝ մինչև ժամը 08:00-ն, Երևանում արձանագրվել է ճանապարհատրանսպորտային 482 պատահար։ Նշված 482 պատահարի հաշվառմամբ՝ ընդամենը 1 տրանսպորտային միջոց եղել է ամառային անվադողերով, իսկ 8 մեքենա եղել է ձմեռային մաշված անվադողերով։ Միաժամանակ՝ նույն ժամանակահատվածում Երևանում պարեկները ստուգել են 193 տրանսպորտային միջոց, որոնցից 15-ը եղել են ձմեռային մաշված անվադողերով»։