«Գտնվում ենք անդունդի եզրին, համապատասխան դիրքորոշումներ են պետք»․ Արամ Ա

Մեծի Տանն Կիլիկիո կաթողիկոս Արամ Առաջինի ուղերձը Երևանում կայացած ՀՅԴ 35–րդ Ընդհանուր ժողովում ընթերցեց Արաբական միացյալ Էմիրությունների, Քուվեյթի և հարակից շրջանների թեմի հոգևոր առաջնորդ և կաթողիկոսի ներկայացուցիչ Գերաշնորհ տեր Մեսրոպ արքեպիսկոպոս Սարգսյանը։ Ուղերձում մասնավորապես ասված էր․ «Խորապես մտահոգիչ է Հայաստանին, Արցախին ու Սփյուռքին պատած վիճակը։ Աշխարհաքաղաքական ներկա պայմաններն ի նպաստ չեն մեզ համար, շրջապատված ենք տագնապներով՝ ներքին, թե՝ արտաքին։ Գտնվում ենք անդունդի եզրին, համապատասխան դիրքորոշումներ պետք է որդեգրենք՝ հեռու ամեն տեսակ անիրատեսական մոտեցումներից ու մակերեսային դատողություններից․․․ Եկեղեցին չի կարող անտարբեր մնալ, լինել կրավորական ու հետևողի դերում, երբ մեր հոգևոր, բարոյական ու ազգային արժեքներն են նահանջում, երբ ներքին ճեղքերը խախտում են մեր ազգի միասնակությունը, երբ ժամանակավոր ու խաբուսիկ խաղաղության դիմաց զիջման քաղաքականությունը վտանգում է Հայաստանի հողային ամբողջականությունը, երբ մեր ազգի խորհրդանիշները խաթարվում են»։