«Սահմանազատումը սկսվելու է հյուսիսային անկյունից»․ Մհեր Գրիգորյան

«Սահմանազատման վերաբերյալ ամբողջ տեղեկատվությունը հրապարակային է։ Վերջին հանդիպումից հետո մենք հրապարակել ենք և մատնանշել՝ ոնց ենք շարունակելու։ Սահմանազատումը սկսվելու է հյուսիսային անկյունից. դա ընդհանուր կոնսենսուսային որոշում է»,- այս մասին այսօր լրագրողների հետ զրույցում հայտարարեց ՀՀ փոխվարչապետ Մհեր Գրիգորյանը։

Անդրադառնալով հարցին, թե երբ է սկսվելու սահմանազատման գործընթացի նոր փուլը, Գրիգորյանը ասաց, որ հստակ ժամկետներ չի կարող նշել։

«Իմ կարծիքով՝ ևս մեկ հանդիպում կլինի՝ հանձնաժողովների, աշխատանքային խմբերի հանդիպում, քանի որ դեռ հարցեր կան քննարկելու»,- նշեց փոխվարչապետը։

Հարցին, թե Ջերմուկի հատվածում այս տարի սահմանազատում իրականացվելո՞ւ է, Գրիգորյանն արձագանքեց․ «Չեմ կարող պատասխանել այդ հարցին, աշխատանքային հանդիպումների արդյունքում կհրապարակենք մեր անելիքների մասին։ Պայմանավորվածություններ կան, որ ինտենսիվ պետք է լինեն հանդիպումները»։