«Իշխանությունն ի՞նչ պետք է անի, զորք վերցնի, գնա Բաքվի բա՞նտ»․ Գագիկ Մելքոնյան

«Բաքվում ընթացող դատավարությունը խեղկատակություն է, դատավարություն չէ, իրենք ուզում են բաներ կորզել՝ ի վնաս Հայաստանի․ ապօրինի դատավարություն են սարքել, որպեսզի աշխարհին ցույց տան, իբր թե նրանք պետական հանցագործներ են»,- այս մասին «24Նյուզ»-ի հետ զրույցում նշեց «Քաղաքացիական պայմանագիր» խմբակցության պատգամավոր Գագիկ Մելքոնյանը՝ անդրադառնալով Բաքվում ընթացող կեղծ դատավարության և Արցախի գերեվարված ռազմաքաղաքական ղեկավարության նկատմամբ կիրառվող կտտանքների վերաբերյալ դիտարկմանը։

Հարցին, թե արդյոք ՀՀ իշխանության թուլության մասին չի վկայում այն, որ շարունակում են այդ մարկանց կտտանքների ենթարկել Բաքվի բանտում, Մելքոնյանը պատասխանեց․ «Այսինքն՝ իշխանությունն ի՞նչ պետք է անի, զորք վերցնի, գնա այդ բանտի վրա՞, իշխանությունն ի՞նչ պիտի անի, որ չի՞ անում։ Միջազգային հարթակներում իշխանության ներկայացուցիչները բարձրաձայնում են, որ Արցախի ղեկավարությունը գտնվում է Բաքվի բանտում, և ապօրինի դատավարություն է կազմակերպվում․․․ Շահրամանյանին պետք է հարցնեք, թե ոնց եղավ, որ այս մարդիկ Բաքվի բանտերում հայտնվեցին, ինչ պայմանավորվածություն ունեցան, ոնց հանձնեցին Բաքվին»։