«Քաղաքական հրահանգով փորձ արվեց մեր քննարկումը տապալել»․ Թագուհի Թովմասյան

Ինչպես հայտնել ենք, ԱԺ-ում ընդդիմադիր պատգամավոր Թագուհի Թովմասյանի և հասարակական, քաղաքական գործիչ Էդգար Ղազարյանի նախաձեռնությամբ կազմակերպվել է «Կառավարության լեգիտիմության հարցի վերաբերյալ» քննարկում։ Այն անցկացվում է փոքրիկ սենյակում, քանի որ, ինչպես հայտնեց Թագուհի Թովմասյանը, նախապես պայմանավորված դահլիճն իրենց չի տրամադրվել․ «Առավոտյան ԱԺ աշխատակազմի ղեկավար-գլխավոր քարտուղար Դավիթ Առաքելյանը գրավոր տեղեկացրեց, թե ջուր է լցվել սրահի էլեկտրական լարերի վրա և նախատեսված դահլիճը մեզ հրաժարվեցին տրամադրել: ԱԺ-ում կան բազմաթիվ դահլիճներ, սակայն մեզ այլ դահլիճի առաջարկ չարվեց»,- հայտնեց Թագուհի Թովմասյանը՝ նշելով, որ նախապես բոլոր դահլիճները ինչ-որ միջոցառումների պատրվակով զբաղեցվել են․ «Քիչ առաջ տեղեկացրին, որ սենյակներից մեկը ազատվել է, որը զբաղեցրել էր «Քաղաքացիական պայամանագիր» խմբակցության պատգամավոր Ծովինար Վարդանյանը: Ուղղակի քաղաքական հրահանգով փորձ արվեց մեր այսօրվա քննարկումը տապալել, որ չխոսենք Փաշինյանի և նրա կառավարության լեգիտիմության մասին»,- ասաց Թովմասյանը՝ նշելով, որ լրատվականների կապը ևս երկար ժամանակ արգելափակված էր, ուղիղ եթեր ապահովել չէր ստացվում։