«Անբարո է Անդրանիկ Քոչարյանի հայտարարությունը»․ Ժաննա Ալեքսանյան

«Մենք տեսնում ենք, որ իշխանությունների ջանքերը շատ նվազ են, բայց պետք է հանրային արձագանքը մեծացնենք և իշխանություններից պահանջենք՝ դատապարտել»,- Կարմիր խաչի հայաստանյան գրասենյակի մոտ գերիների վերադարձի պահանջով ակցիայի ժամանակ լրագրողների հետ զրույցում ասաց իրավապաշտպան Ժաննա Ալեքսանյանը՝ նշելով, որ հանրության արձագանքն էլ այդքան մեծ չէ․ «Մենք տեսնում ենք, թե ինչ պառակտվածություն կա մեր հանրության մեջ, մենք դա տեսնում ենք սոցցանցերում, բայց սա մի իրավիճակ է, երբ պետք է բոլորը համախմբվեն»,- ասաց Ալեքսանյանը։
Հարցին, թե պատգամավոր Անդրանիկ Քոչարյանն ասել է, որ նրանք պետք է ամեն ինչ անեին, գերի չընկնեին, ինչպե՞ս եք գնահատում նման հայտարարությունները, Ալեքսանյանը պատասխանեց․ «Ես դա գնահատում եմ անբարո հայտարարություն, երբ մարդիկ օրհասական, մահվան շեմին են, կանգնում և այդպիսի հայտարարություններ են անում։ Չեմ բացառում, որ մի օր էլ կարող է Անդրանիկ Քոչարյանի հետ այդպիսի բան պատահի: Շատ վատ են իրենց պահում իշխանամերձ շրջանակները»։