«Խստագույն զգուշություն է պահանջում պատանդների դատավարության որևէ արծարծում»․ Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը․ «Կարծես թե որևէ մեկի մոտ չկա կասկած, թյուրընկալում, «տարընթերցում», որ Բաքվում պահվող մեր պատանդ հայրենակիցների հանդեպ դատավարությունը Ադրբեջանը իրականացնում է Հայաստանի դեմ իր քաղաքականության ծիրում: Այդ դատավարությունը Հայաստանի դեմ առավելապաշտության քաղաքականության մի դրվագ է:

Իսկ դրա մի շերտն էլ հայ հանրության հանդեպ տեղեկատվական-հոգեբանական ներգործությունն է:

Դա նշանակում է, որ այդ հարցում պետք է լինել չափազանց զգույշ, ուշադիր, բծախնդիր: Իսկ դա առաջին հերթին ենթադրում է զերծ մնալ Բաքվում դատարանի դահլիճում հնչող հայտարարությունները հայաստանյան տեղեկատվական դաշտ բերելուց:

Բնական է, որ այդ հայտարարություններին պետք է հետևել: Բայց բերել դրանք մեր տեղեկատվական դաշտ, նշանակում է մասնակցել Հայաստանի հանդեպ Ադրբեջանի գործողությանը՝ կամա, թե ակամա: Ընդ որում, էական չէ, թե ինչ նկատառումով ենք բերում:

Որովհետև մեր տեղեկատվական դաշտը բացարձակապես անկառավարելի է, գրեթե ամբողջապես մանիպուլյատիվ, ծայրահեղ բևեռացված, գերակշռող մասով՝ ապամասնագիտացված, զգայուն թեմաներ մարսելու անընդունակ:

Հետևաբար, այդ դաշտում հայտնվող գրեթե ամեն ինչ ենթակա է «մուտացիայի» մեծ վտանգի: Իսկ, հաշվի առնելով հարցի և իրավիճակի խիստ առանձնահատկությունը, խստագույն զգուշություն է պահանջում թեմայի որևէ տեղեկատվական արծարծում ընդհանրապես, և դատարանի դահլիճում հնչած որևէ հայտարարություն՝ մասնավորապես»: