«Հորս ասուլիսից հետո ինչ-որ անառողջ, անհասկանալի պառակտում սկսվեց»․ Լևոն Քոչարյան

««Ո՞վ բերեց Նիկոլին» թեման միշտ էլ շրջանառվել է, բայց չեմ անդրադարձել, քանի որ ավելի կարևոր գործ ունենք անելու»,- լրագրողների հետ զրույցում ասաց ԱԺ «Հայաստան» խմբակցության պատգամավոր Լևոն Քոչարյանը՝ անդրադառնալով թեմայի շուրջ երկրորդ նախագահ Ռոբերտ Քոչարյանի աջակիցների և ՀՀԿ-ականների հեռակա բանավեճին։ «Այնպես չէ, որ այս ամենը ինչ որ տեղից ուղղորդվում է։ Պարզապես 2018 թվականին կատարվածի շուրջ հնչում են կարծիքներ, որոնք չեն գոհացնում, չեն փարատում ինչ-որ կասկածներ,

հետևաբար խոսակցությունները շարունակվում են, տարբեր վարկածներ են առաջ բերվում»,- ասաց Լևոն Քոչարյանը։
Դիտարկմանը, թե նրա հորեղբոր աղջիկը այդ օրերին հրապարակից տուն չէր գնում, Քոչարյանը պատասխանեց․ «Ո՞ւ․․․, այո ձեր նշած մարդը եղել է հրապարակում, բայց եթե ինչ-որ մեկին թվում է՝ զանգել, հարցրել են՝ գնան, թե չգնան ու դրական պատասխան են ստացել, իհարեկ, այդպես չէ։ Ես այդ օրերին չեմ եղել հրապարակում, ցերեկը պատահական անցնելուց նկարել էին, ինչքան գիտեմ հրապարակել են լուսանկարը»,- ասաց Քոչարյանը՝ հրաժարվելով 2018-ի վերաբերյալ հարցերին կոնկրետ պատասխաններ տալուց։ Կրկին անդրադառնալով ընդդիմադիրների հեռակա բանավեճին՝ ասաց․ «Հորս ասուլիսից հետո ինչ-որ հարձակում սկսվեց, որի պատճառը չեմ հասկանում։ Ո՞րն է նպատակը, ասուլիսի ընթացքում որևէ վիրավորական բան չի հնչել»,- ասաց Քոչարյանը։ Նա ուղիղ կերպով ոչ ոքի չմեղադրեց «Նիկոլին բերելու» համար․ «Նիկոլին բերեց բարձրացված ալիքը, պետք է հասկանալ՝ թե ինչո՞ւ ալիքը բարձրացավ»,- նշեց նա՝ կրկնելով, որ չի հասկանում, թե ինչու Ռոբերտ Քոչարյանի ասուլիսից հետո անհասկանալի պառակտում սկսվեց ընդդիմադիր դաշտում։