«Թույլ չենք տալու, որ 1999-2012 թվականների կրիմինալը վերադառնա Գյումրի»․ Նազելի Բաղդասարյան

«Իմ գրառման մեջ նշել էի, որ գյումրեցիները հիշում են, թե ով որ թվին ինչ է թալանել, յուրացրել, և այդ ամենի մասով կան ապացույցներ․․․ Այդ մասին ես խոսել եմ նաև երբ ԱԺ պատգամավոր էի, ԱԺ ամբիոնից եմ խոսել՝ ոչ միայն Վարդան Ղուկասյանի, այլ նաև այն պաշտոնյաների մասով, ովքեր Գյումրի քաղաքից ինչ-որ ապօրինություններ են իրականացրել»,- այս մասին այսօր լրագորղների հետ զրույցում նշեց վարչապետի մամուլի քարտուղար Նազելի Բաղդասարյանը՝ ընդգծելով, որ այդ գործերով այժմ քրեական վարույթներ կան հարուցված։

Բաղդասարյանը հավելեց, որ Գյումրիի նախկին քաղաքապետ Վարդան Ղուկասյանն սպառնացել է ոչ միայն այս փուլում․ «Անձամբ ինձ սպառնացել է բազմաթիվ անգամներ, այդ թվում՝ նաև իմ երեխայի հետ կապված դեպքը, երբ որ, հիշում եք, երբ քրեական ենթամշակույթի մասին օրենքն էի զեկուցում։

Այդ սպառնալիքներին սովոր ենք։ Բայց ես վստահորեն ասում եմ՝ մենք՝ իշխանությունը, ժողովուրդը, թույլ չենք տալու, որ 1999-2012 թվականների կրիմինալը վերադառնա քաղաք»։