«Հրաժարվում եմ արձագանքել Անդրանիկ Քոչարյանի նման ադրբեջանամետ մարդուն». Մանե Թանդիլյան

«Ապրելու երկիր» կուսակցության նախագահ Մանե Թանդիլյանը Ազատության հրապարակում շարունակում է հացադուլը՝ խնդրելով Բաքվի բանտում ապօրինաբար պահվող Արցախի նախկին պետնախարար Ռուբեն Վարդանյանին դադարեցնել հացադուլը։ «Իմանալով՝ ինչ հայորդի է բաքվի բանտում, ուղղակի ուզում եմ, որ նա ողջ մնա, քանի որ հայ ժողովուրդն իր կարիքն ունի։ Թե որքանով է ժողովուրդը դա հասկանում, չգիտեմ։ Հուսով եմ՝ ժողովուդը մի օր ուշքի կգա, կպահանջի օր առաջ վերադարձնել հայորդիներին։ Կուզենամ, որ վերանան այն բոլոր պատճառները, որոնց համար Ռուբեն Վարդանյանը հացադուլ է անում»,- «Նյուզ»-ի հետ զրույցում ասաց Թանդիլյանը։ Նրա խոսքով տեղեկություն չունեն, թե Վարդանյանը որքանով է տեղյակ իր և մնացածի խնդրանքներից։ «Վստահ էլ չեմ, որ իմանալուց հետո կդադարեցնի հացադուլը, որովհետև ոչ մեկս չգիտի՝ ինչ է կատարվում այնտեղ, թե նա ինչ է դրանով անում։ Ուղղակի ուզում եմ, որ ողջ մնա»,- ասաց Թանդիլյանը։ Նրա կարծիքով Բաքվում հայ պատանդների վիճակը չի բարելավվել, ինչպես ներկայացնում են, ուղղակի միջազգային ճնշման ներքո ինչ-որ բան ստիպված են լինում անել։ «Սիրելի՛ ժողովուրդ, եկեք տե՛ր կանգնենք մեր գերիներին, մենք ունենք անպատասխանատու, անունակ իշխանություն, որը եթե չնպաստի նրանց այնտեղ պահման, հետ չի բերելու։ Ես սա ամեն օր անգամ նրանց խոսույթում եմ տեսնում»,- ասաց Թանդիլյանը՝ նշելով, որ այդ խոսույթը ազդակ է Ալիևին, որ նա հայ գերիներին պահի Բաքվում։
Լրագրողի դիտարկմանը, թե Անդրանիկ Քոչարյանն ասել է, որ ռազմաքաղաքական ղեկավարությունը չպետք է գերի ընկներ, Թանդիլյանը պատասխանեց․ «Ես հրաժարվում եմ արձագանքել Անդրանիկ Քոչարյանի նման ադրբեջանամետ մարդու, որն ամոթ չունի։ Նա ուղղակի փորձում է ատելություն տարածել այդ մարդկանց նկատմամբ»,- ասաց Թանդիլյանը։