«Գերիների վերադարձի բանալին Փաշինյանի ձեռքում է». Վարդան Օսկանյան

ՀՀ ԱԳ նախկին նախարար Վարդան Օսկանյանը ֆեյսբուքյան եթերում անդրադարձել է Բաքվում անօրինաբար պահվող հայ գերիների խնդրին․ «Ես զգում եմ, որ Հայաստանի իշխանություններն այս հարցն ուզում են ներքաղաքական խնդրի վերածել՝ իրենց դիրքերը պահպանելու և ամրացնելու կամ իրենց անգործությունը թաքցնելու համար։ Իշխանությունները բացարձակ ոչինչ չեն արել առ այսօր, այս վերջին շրջանի փոքր ակտիվությունը, արտաքին գործերի նախարարության հայտարարությունը կամ արտաքին գործերի նախարարի Ժնևի ելույթում ինչ-որ ակնարկ անելն այս հարցին, բավարար չեն և արդյունք են միայն ու միայն վերջին շաբաթներին Հայաստանում ժողովրդի կողմից բողոքի և ինչ-որ տեղ նաև ցասումի հետևանք: 1.5 տարի այդ տղաներն անօրինաբար Բաքվի բանտում են, և Հայաստանի իշխանությունները, ես կարող եմ բավական մեծ վստահությամբ ասել, որ ոչինչ չեն արել: Դրա ամենավառ ապացույցն այդ մեծ հնարավորության կորուստն էր, որ ԱԳՆ-ն բաց թողեց իր ձեռքից՝ Մալթայում ԵԱՀԿ նախարարների խորհրդի հանդիպման ընթացքում իր ելութում որևէ անդրադարձ չանելով այս հարցին: Իր 10 րոպեանոց ելույթում մի բառ անգամ չկա մեր պատանդների, գերիների մասին․․․Բակո Սահակյանն ու մյուսները Բաքվի բանտում շատ ավելի ազատ են ու անկախ, քան դուք՝ ձեր ողջ իշխանությամբ այս արևի տակ՝ ձեր դիվանագիտական իմունիտետով: Դուք անկախ չեք, դուք համարձակ չեք, դուք վախկոտ եք, չեք կարողանում այս հարցը բարձրացնել ճիշտ ատյաններում, որովհետև վախեցած եք և գիտեք, որ այս բոլորը ձեր սխալների արդյունք են»,- ասել է Վարդան Օսկանյանը՝ հավելելով, որ նրանց վերադարձի բանալին Փաշինյանի ձեռքին է։