«Ալ Շարաան նախընտրելու է բռնի գործողություններով լռեցնել բոլորին». Արա Պողոսյան

Քաղաքագետ Արա Պողոսյանի ֆեյսբուքյան գրառումը. «Եթե անգամ հիմա հնարավոր լինի հանդարտեցնել իրավիճակը Սիրիայում, կարծում եմ, որ այլևս հնարավոր չի լինելու ներքին համերաշխության վերականգնումը, որը առաջին մեկ ամսվա ընթացքում այնքան հավանական էր թվում։
Սակայն, հաշվի առնելով տարբեր խմբավորումների առկայությունը, արտաքին դերակատարների շահերը, Թուրքիայի մենիշխանությունը Սիրիայում՝ հատկապես թուրքամետ և թուրքմենական խմբավորումների միջոցով, էապես նվազում է Սիրիայում համերաշխության վերականգման հավանականությունը։
Ավելի հավանական սցենարներից մեկը, որ երկրի միասնությունը պահպանվի, այն է, որ Ալ-Շարաան տարանջատվի Թուրքիայից, ազատվի բոլոր էքստրեմիստական խմբավորումներից՝ օգտագործելով նաև Լաթաքիայում սկիզբ առած ջարդերի փաստը (իր վրայից մաքրելով նաև դրա պատասխանատվությունը), և հանդես գա որպես «բոլորի նախագահ», Սիրիան վերածելով աշխարհիկ ժողովրդավարական պետության։
Բայց կարծում եմ՝ այս սցենարին չի գնա, քանի որ Ալ-Շարաան ամեն դեպքում ռադիկալ, նույնիսկ էքստրեմիստական մեթոդների կողմնակից է, հետևաբար կնախընտրի բռնի գործողությունների միջոցով լռեցնել բոլորին և ենթարկեցնել իրեն, ունենալով Թուրքիայի մեթոդաբանական, ռազմական, քաղաքական աջակցությունն ու ուղղորդումը։
Իսկ սա երկարաժամկետ հեռանկարում Սիրիան կվերածի դիմակայության թատերաբեմի, որտեղ տարբեր խմբերի ներկայացուցիչներ հավանաբար կձգտեն ազատվել Ալ-Շարաայի միջոցով Թուրքիայի գերիշխանությունից։
Այլ սցենարներ ևս կան իհարկե, այդ թվում առավել հավանական, բայց հիմա կարծում եմ, այս երկուսը ներկայացնելու հերթն էր»: