«Իրենք էլ իրենց խոսքերին արդեն չեն հավատում»․ Աննա Կոստանյան

ԱԺ նախկին պատգամավոր Աննա Կոստանյան ֆեյսբուքյան գրառումը. «Այսօր ՀՀ ԱԺ ընդդիմադիր պատգամավորների հետ հարցուպատասխանի ընթացքում ՀՀ արտաքին գործերի նախարար Արարատ Միրզոյանը հայտարարեց և փաստացի ընդունեց, որ խաղաղության պայմանագրի դրույթներին համաձայն է միայն Հայաստանը, քանի որ Ադրբեջանի հարցում վստահություն չունեն, փաստեց նաև, որ այդ երկիրը կառուցողական տրամադրություններ չունի, ինչը միշտ հետևողական ձևով ալիևի հռետորաբանության մեջ տեսել ենք: Այս ամենը երեկ ընդունեց նաև վարչապետի աթոռն օկուպացրած անձը՝ հաստատելով ադրբեջանական կողմից դրական ազդակների բացակայությունը, սակայն վստահաբար հաստատեց, որ ինքը միջանցք տալու է՝ անկասկած ադրբեջանական նախապայմաններով:
Այսքանից հետո շարունակում են խաղաղության կեղծ օրակարգով խաբել ու մոլորեցնել հայ ժողովրդին, որ այլ ԵԼՔ չկա, քան հանձնվել Հայաստանը Արևմտյան Ադրբեջան հորջորջող պետության գթասրտությանը:
Միրզոյանի խոսքի լղոզված սայթաքումներից հասկանում ես, որ իրենք էլ իրենց արտաբերած խոսքերին արդեն չեն հավատում, ասում է՝ բա ի՞նչ անենք: Ի՞նչ պիտի անեք, դուրս գաք և ուղիղ ձևով հայտարարեք, որ ձախողել եք ձեր «առաքելությունը»՝ տասնյակ տարիներ նախապատրաստելով Հայաստանը այս կեղծ խաղաղասիրությանը, ընդունեք ձեր բոլոր մեղքերը, որ գիտակցաբար մի ամբողջ պետություն տարել եք ուղիղ կործանման, իսկ հետո արդեն հայ ժողովուրդը կորոշի, թե ձեր նման ձախողակ հայրենավաճառների հետ ինչպես կվարվի:
«Շնորհիվ» այս վարչախմբի՝ Հայաստանը միջազգային խաղացողների մոտ վստահության զրոյական մակարդակում է: Ու դեռ շատ երկար ժամանակ է պահանջվելու այդ վստահությունը վերակառուցելու համար՝ կախված, թե ով կլինի դրա ճարտարապետը»։