«Գործող վարչախումբն Ալիևի հետ եկել է համաձայնության՝ սահմանազատման գործընթացը տարաժամկետել մինչև ընտրությունները»․ Միհրան Պողոսյան

«Սահմանազատման գործընթացը կանգնեցված է․ դա փաստ է։ Եվ դա այն ուժերի շնորհիվ է, որոնք կարողացան ոտքի հանել ժողովրդին, և գործող վարչախումբը տեսավ, որ կարող է իր աթոռը կորցնել»,- այս մասին «Մեդիահաբ»-ի եթերում նշել է Ազգային ժողովի նախկին պատգամավոր, ԴԱՀԿ ծառայության նախկին ղեկավար Միհրան Պողոսյանը, որ վեց տարուց ավելի է՝ Մոսկվայում է և 1 տարի առաջ նոր կուսակցություն է հիմնել:

«Գործող վարչախումբը կարողացավ Ալիևի հետ գալ համաձայնության՝ սահմանազատման գործընթացը տարաժամկետել մինչև հերթական ընտրությունները։ Եվ եթե գործող վարչախումը հերթական ընտրություններում, Աստված մի արասցե, հաղթի, հանձնելու է ամեն ինչ, ինչ Ալիևը պահանջի։

Իսկ Ալիևը խոսում է 300 հազար ադրբեջանցիների՝ ՀՀ տարածքում բնակվելու մասին, պահանջում է միջանցք տալ, Սահմանադրության փոփոխություն, Ցեղասպանության ընդունման պահանջից հրաժարվել, միջազգային ատյաններում դատական բոլոր հայցերից հրաժարվել և մոռանալ պատմությունը, Արցախը մոռանալ։ Մենք պետք է հասկանանք՝ Ալիևի խնդիրը ընդհանրապես հայկական գենի վերացումն է»,- ասել է Պողոսյանը։