«Եթե այսօր հրաժարվենք Արցախի իրավունքների վերականգնումից, վաղը կվիճարկվի Հայաստանի ապագան». Դավիթ Մանուկյան

«Ապրելու երկիր» կուսակցության քաղաքական խորհրդի անդամ Դավիթ Մանուկյանի ֆեյսբուքյան գրառումը. «Բաքուն ստանալով իր ուզած բովանդակությամբ «խաղաղության պայմանագիրը», չի շտապում այն ստորագրել, դեռ ավելին նոր պահանջներ է առաջ քաշում։
Խաղաղություն չի լինում նվաստացման գնով։ Եթե դու պատրաստ ես զիջել առանց պայքարի, դու չես ստանա խաղաղություն, դրա փոխարեն «դուռդ կթակեն» նոր պահանջներ, նոր ճնշումներ, նոր նվաստացում։ Ադրբեջանը այսօր հենց այդպես է վարվում՝ ստանալով ավելին, նոր պահանջներ առաջ քաշելով, իր մաքսիմալիստական ծրագրերն ավելի մոտեցնելով իրականությանը։
Հայաստանը կանգնած է գոյաբանական մարտահրավերի առաջ։ Արցախը պարզապես տարածք չէ, այլ ազգային դիմադրության ու ինքնության խորհրդանիշ։ Արցախից հրաժարվելը չի բերի խաղաղություն՝ կնշանակի ճանապարհ բացել հաջորդ զիջումների համար։ Եթե այսօր, մենք հրաժարվենք Արցախի իրավունքների վերականգնումից, վաղը կվիճարկվի Հայաստանի ապագան։
Հայաստանը պետք է մնա պայքարի դաշտում՝ թե՛ դիվանագիտական, թե՛ իրավական։ Միջազգային ատյաններում մեր ներկայացրած հայցերը և ԵԱՀԿ Մինսկի խմբի պահպանումը մեր վերջին պաշտպանական գիծն են, և այդ գիծը չպետք է քանդվի մեր իսկ ձեռքով։
Խաղաղությունը հնարավոր է միայն արդարության հիման վրա։ Ովքեր փորձում են համոզել, որ հպատակությունը խաղաղություն է, կամ չգիտեն պատմության դասերը, կամ գիտակցաբար Հայաստանը տանում են դեպի կործանման։ Մենք չենք կարող թույլ տալ, որ ապագան որոշեն նրանք, ովքեր վախենում են պայքարից։ Մենք պարտավոր ենք դիմադրել՝ դիմադրե՛լ մեր պայքարում և հաղթել»: