«Առողջապահության նախարարությունում «գծո՞ւծ» են». Ծաղիկ Վարդանյան

«Առողջության և իրավունք» ՀԿ համահիմնադիր Ծաղիկ Վարդանյանի ֆեյսբուքյան գրառումը. «Google հարթակում փնտրումների ժամանակ այսօր «գտա» FIP «Փաստերի ստուգման հարթակ»-ի մոտ մեկ տարի առաջ Երևանի ավագանու ընտրություններին ընդառաջ՝ «Քաղաքացիական պայմանագիր» կուսակցության 2023 թվականի հուլիսի 31-ին կազմակերպված դրամահավաքի նվիրատուների վերաբերյալ հրապարակումը: Ըստ FIP-ին ՔՊ կուսակցության տրամադրած ցանկի՝ հուլիսի 31-ին դրամահավաքին 996 նվիրատու է եղել, նվիրաբերված գումարն ընդհանուր առմամբ կազմել է ավելի քան 509 մլն դրամ կամ գործող փոխարժեքով՝ $1․255 մլն։
Ակամայից սկսեցի ուսումնասիրել նվիրատուների ցանկը: Ինձ հետաքրքրեց՝ ինչպիսի՞ վերաբերմունք ունեն ՔՊ-ական պաշտոնյաները սեփական կուսակցության նկատմամբ։ Պարզվում է, որ քաղաքացիական կուսակցության բարձրաստիճան պաշտոնյաները բավականին առատաձեռն են գտնվել։ Մասնավորապես՝ պաշտպանության նախարար Սուրեն Պապիկյանը և արդարադատության նախկին նախարար Գրիգոր Մինասյանը նվիրաբերել են 500 հազարական դրամ, 500 հազար դրամ է նվիրաբերել նաև որոշ պատգամավորներ և այլ պաշտոնյաներ։ Ցուցակից պարզորոշ է դառնում, որ ՔՊ-ական բազմաթիվ հայտնի գործիչներ նվիրատվությունը ենթադրաբար իրականացրել են ոչ թե դրամով, այլ դոլարով՝ նվիրաբերելով 500 դոլարից մինչև 1000 դոլարին համարժեք դրամ։ Մեծ գումարներ են նվիրաբերել նաև Ավինյանի գործարար ընկերներն ու մտերիմները և այլն։
Զարմանալի էր, որ առողջապահության նախարարության պաշտոնյանները, ովքեր ՔՊ կուսակցության հովանու ներքո իրենց շատ պաշտպանված և անխոցելի են զգում, այս հարցում ժլատ են գտնվել: Թեև հրապարակված ցուցակից երևում է, որ առողջապահության նախարարության ենթակայությամբ գործող հիմնարկների տնօրենները մեկ մարդու պես նվիրաբերել են 100 հազարական դրամ, սակայն «հեղափոխության» շնորհիվ բարձր աշխատավարձերով բարձրագույն պաշտոններ ստացած և մեծ եկամուտներ ունեցող նախարարի տեղակալներ Լենա Նանուշյանը, Արտակ Ջումայանը և գլխավոր քարտուղար Վարդանուշ Գրիգորյանը նվիրաբերել են 30 հազարական դրամ։ Այսինքն՝ այնքան, որքան ՔՊ-ի՝ որևէ պաշտոն չունեցող շարքային անդամները։
Ի դեպ, իր բարձր պաշտոնին զուգահեռ խոշորագույն դեղ ներկրող ընկերություններից մեկի բաժնետերի ընտանիքի անդամ Անահիտ Ավանեսյանը նվիրաբերել է ընդամենը 120 հազար դրամ։
Հ.Գ. Սույն պաշտոնյաների բոլոր տապալած, ձախողած ծրագրերը հանդուրժած, հանրության դժգոհության կողքով անհաղորդ անցնող հայրենի կուսակցության նկատմամբ նման կրավորական, գծուծ վերաբերմունքը առնվազն անընկալելի է:
Առանց ՔՊ կուսակցության սույն անձիք քանի՞ րոպե կմնան իրենց պաշտոններում»: