«Փորձում են հարցականի տակ դնել հայերի ապրելու իրավունքն այս տարածաշրջանում». Տաթևիկ Հայրապետյան

Ադրբեջանագետ Տաթևիկ Հայրապետյանի ֆեյսբուքյան գրառումը. ««Հայերն ի սկզբանե չեն եղել Ադրբեջանի տարածքում, ոչ էլ ողջ Հարավային Կովկասում։ Նրանք բնիկ չեն։ Նրանք վերաբնակեցվել են Ցարական Ռուսաստանի կողմից։ Նրանց վերաբնակեցման վերաբերյալ պաշտոնական փաստաթղթեր կան, և ոչ մի հայ քաղաքական գործիչ կամ պատմաբան չի կարող դա հերքել։ Եթե ​​ուսումնասիրեք Արկադի Ղուկասյանի տոհմաբանությունը, պարզ կլինի, թե երբ են նրա նախնիները ժամանել ադրբեջանական հող և բնակություն հաստատել։ Նրանց Ադրբեջանին կապող ոչինչ չկա։ Նրանք երբեք կառուցող չեն եղել, նրանք միշտ կործանիչներ են եղել․․․Սա հայկական վանդալիզմ է. Հիմա, երբ անկյուն են ընկել, ողորմելի մարդկանց պես են իրենց պահում․․․»,- նման ատելության խոսքով է հանդես եկել Ադրբեջանի ԱԺ փոխնախագահը իր հարցազրույցներից մեկում։
Հայերի՝ բնիկ լինելու, այդ թվում՝ հենց Արցախի տարածքում բնիկ լինելու մասին փաստերն այնքան շատ են, որ այդտեղ անգամ քննարկման թեմա էլ չկա, բայց ցավալին այն է, որ նման ձևակերպումներով նրանք ոչ միայն ատելության խոսք են տարածում՝ պետական մակարդակով, այլ փորձում են հարցականի տակ դնել հայերի ապրելու իրավունքն այս տարածաշրջանում»: