«Մտայնությունը, թե Ադրբեջանը զբաղվում է վրեժխնդրությամբ, մոլորություն է»․ Հակոբ Բադալյան

Քաղաքական մեկնաբան Հակոբ Բադալյանի ֆեյսբուքյան գրառումը․ «Գիտակցաբար, թե որոշակի ազդեցության ներքո, առկա է կարծիք, թե Ադրբեջանը Հայաստանի հանդեպ իր քաղաքականությամբ պարզապես վրեժխնդիր է լինում առաջին պատերազմի պարտության ու դրան հաջորդած տարիների համար:
Մտայնությունը, թե Ադրբեջանը զբաղվում է «վրեժխնդրությամբ», կամ բարեխիղճ մոլորություն է, կամ հանրությանը մոլորեցնելու անբարեխիղճ փորձ:
Վրեժխնդրությունը զգայական հարթություն է՝ իր գերակշռող մասով: Իսկ Ադրբեջանը Հայաստանի հանդեպ զգայականությամբ չէ, որ զբաղված է, այլ սառնասիրտ քաղաքականությամբ, որի նպատակը՝ ինչպես բազմիցս ասել եմ, Հայաստանը պարզապես դեկորատիվ պետության վերածելն է: Դեկորատիվ պետություն, որն ամբողջությամբ ենթակա կլինի Ադրբեջանի ռազմավարությանը:
Ընդ որում, բոլորովին տարօրինակ չէ, որ Ադրբեջանը դրել է այդպիսի խնդիր ու գնում է դրա հետևից, հատկապես մի պատմական շրջափուլում, երբ տեղի է ունենում համաշխարհային նոր վերաբաժանում:
Տարօրինակը այն է, որ Հայաստանում կարող են համառորեն «չնկատելու» տալ այդ խնդիրը, փաթեթավորելով այն զանազան երևակայական պատկերացումներով»: