«Փաշինյանի անբարոյական աճպարարություններն այսքան ողորմելի չէին լինի, եթե խոսքը չվերաբերեր նահատակներին»․ Հարութ Ուլոյան

Հրապարակախոս Հարութ Ուլոյանի ֆեյսբուքյան գրառումը․ «Մի կողմից Փաշինյանը խոսում է այն մասին, թե, իբր 2020 թվականից հետո «իրական» Հայաստանում մենք ոչ մի զիջում չենք արել, ավելի ինքնիշխան ու անկախ ենք եղել, քան դրանից առաջ՝ ուղիղ կերպով նկատի ունենալով այն թեզը, որ 2020 թվականից առաջ եղած «կեղծ» Հայաստանում Ղարաբաղյան հակամարտությունը մեր համար գլխացավանք՝ վզի թոկ է հանդիսացել, և մենք չենք ունեցել պետություն ունենալու հեռանկար։ Իսկ մյուս կողմից՝ «խոստովանում» է, որ մենք ունեցել ենք կորուստներ՝ նկատի ունենալով 44-օրյա պատերազմի հազարավոր նահատակներին: Այս կոնտեքստում, Փաշինյանը հավելում է, որ ինքն իր համար պարզել է, որ մեր նահատակները զոհվել են պետականության, ինքնիշխանության, խաղաղության ու պետություն ունենալու շանսի համար:
Փաշինյանի ստեղծած անբարոյական մանիպուլյացիոն աճպարարություններն այսքան ողորմելի չէին լինի, եթե խոսքը չվերաբերեին նահատակներին, քանի որ եթե Փաշինյանի առաջ քաշած «իրական» Հայաստանի վերաբերյալ թեզերը որպես ճշմարտություն ընդունենք, ապա իրողությունը կլինի այն, որ մեր նահատակները զոհվել են ոչ թե «իրական» Հայաստանի, այլ 2020 թվականից առաջ գոյություն ունեցած «կեղծ» ու «պատմական» Հայաստանի համար, որի փառաբանման առաջին ջատագովն, այն ժամանակ, հենց ինքը՝ Փաշինյանն էր»: