«Եթե իսկապես ունենք պոտենցիալ, եկեք գնանք Նիկոլին գահընկեց անելու». Արամայիս Աղաբեկյան

Արցախի ԱԺ պատգամավոր Արամայիս Աղաբեկյանի ֆեյսբուքյան գրառումը. «Հանրային միջոցառումներին Ռոբերտ Քոչարյանի և Սերժ Սարգսյանի ներկայացուցիչների մասնակցությունը մարդկանց չգալու պատճառ չէ և չի կարող լինել։ Ես նույնպես առանձնապես հիացած չեմ այն հանգամանքով, որ մի քանի հարյուր մարդ հավաքվելու դեպքում նրանք անմիջապես հայտնվում են։
Ավելին, Տիգրան Ուլուբաբյանի գործով Քննչական կոմիտեի առաջ հավաքվելու առաջին օրը, երբ մարդիկ զգալիորեն շատ էին, նրանց ներկայացուցիչներից շատերը եկան։ Նրանք եկան րոպեներ անց, երբ արդեն բավականաչափ մարդ էր հավաքվել, և հարցազրույցներ տվեցին։
Խոսքս չի վերաբերում ՀՀԿ պատգամավոր Տիգրան Աբրահամյանին, ով հաջորդ օրը նույնպես, չնայած հավաքի ոչ այդքան մարդաշատությանը, եկել էր և դեռ մի բան էլ իր հետ մարդկանց էր ներգրավել։
Եթե եղել են նաև այլ պատգամավորներ, ում ես չեմ նկատել, թող ներեն ինձ։
Բայց այս գրառումը ամենևին էլ այդ մասին չէ։ Այն պատասխան է նրանց, ովքեր իրենց չգալու պատճառ կամ հիմնավորում են ներկայացնում «նախկինների» այնտեղ լինելը։
Սիրելի քույրեր և եղբայրներ, քանի դեռ խորհրդարանում այս մարդիկ են ներկայացված որպես ընդդիմություն, նրանք ունեն իրավունք և մանդատ՝ մասնակցելու ցանկացած հանրային միջոցառման, լինելու լրատվամիջոցների ուշադրության կենտրոնում և հանդիսանալու երեկոյի հիմնական խաղացողները։
Նրանք այդ մանդատը ստացել են ժողովրդից և արդարացիորեն իրացնում են այն։ Անհեթեթ եմ համարում նաև նրանց քաղաքականությունից հեռանալու պահանջը, քանի որ նրանց իրավունքները սահմանափակելու իրավունք ոչ ոք չունի։ Կացինը իրենցն է՝ առել են, թե չեն առել, կապ չունի՝ փայտ կտրելու իրավունք ունեն։
Ավելի լավ է մտածել այլընտրանք առաջարկելու մասին և գործնական քայլեր ձեռնարկել այդ ուղղությամբ՝ նախկիններին հանգիստ թողնելով։ Այլապես նրանց թիրախավորում են այս պահին քաղաքական դաշտում տեղ և դիրք չզբաղեցնողներն ու նիկոլիստները, իսկ այս ընդհանրականը հեչ լավ ընդհանրական չէ։
Եթե այդքան ուժեղ ենք, եթե իսկապես ունենք պոտենցիալ, եկեք միասին պլատֆորմ ստեղծենք, մրցակցենք, բանավիճենք, մեր մեջ ընտրություն կատարենք և գնանք Նիկոլին գահընկեց անելու։
Հակառակ դեպքում, միայն բողոքելով ու հուզական հայտարարություններով ոչ մի լավ բանի չենք հասնի։
Այնպես որ, ախպոր պես, նախկիների գոյությունը որպես ինչ-որ բան անելու կամ չանելու արդարացում մի՛ բերեք»: