«Լավ եք ասում, բայց ճիշտ չեք ասում»․ Ալեն Սիմոնյանը՝ Հայկ Մամիջանյանին

«Լավ եք ասում, բայց ճիշտ չեք ասում»,- այս մասին ԱԺ հայտարարությունների ժամին ասաց խորհրդարանի նախագահ Ալեն Սիմոնյանը՝ արձագանքելով «Պատիվ ունեմ» խմբակցության պատգամավոր Հայկ Մամիջանյանի դիտարկումներին։

«Սահմանազատման հանձնաժողով գոյություն ունի, և թե ով է առաջ, ով է հետ, սահմանների խնդրով զբաղվում է կոնկրետ այդ հանձնաժողովը, դրա համար դա «Խաղաղության պամանագրի» մեջ ամրագրված չէ,- նշեց Սիմոնյանը՝ արձագանքելով Մամիջանյանի դիտարկմանը, թե «այն փաստաթուղթը, որը «խաղաղության պայմանագիր են անվանում, դրա մեջ մեր օկուպացված տարածքներն ազատելու մասին որևէ տառ չկա»։

Անդրադառնալով Մամիջանյանի դիտարկմանը, որ գերիների մասին խաղաղության պայմանագրի շուրջ բանակցությունների գործընթացում խոսք չկա, ԱԺ նախագահը նշեց․ «Պատերազմից հետո մենք ունեցել ենք 153 գերեվարված անձ, այսօր մենք ունենք 23 գերեվարված անձ, որոնցից 12-ը ռազմաքաղաքական ղեկավարներ են, որոնք գերեվարվել են 2020 թվականի պատերազմից հետո։ Դա պայմանագրում ամրագրելու հարց չէ: Այդ աշխատանքը շարունակվում է պայմանագրից դուրս, որովհետև պայմանագիրը կարող է ևս 2 տարի չստորագրվել, բայց մեր կողմից ամեն ինչ արվում է, որ մեր գերիները հնարավորինս շուտ վերադառնան: Դրա համար այդ հարցն այնտեղ դնելու որևիցե հասկանալի առիթ և պատճառ չկա և չի կարող լինել»։