««Մայր Հայաստան»-ը պատրաստ է իր ձայնը տալ առավելագույն քվեներ ստացած ընդդիմադիր ուժին»․ Անդրանիկ Թևանյան

«Մայր Հայաստան» դաշինքի առաջնորդ Անդրանիկ Թևանյանը, ամփոփելով Գյումրու ավագանու ընտրությունների արդյունքները, ֆեյսբուքյան եթերում հայտնեց, որ ինչպես հայտարարվել էր, դաշինքը պատրաստ է իր ձայնը տալ առավելագույն քվեներ ստացած ընդդիմադիր ուժին, որպեսզի ՔՊ-ն իշխանազրկվի Գյումրիում․ «Բայց դա բավարար չէ՝ գնդակն այժմ ավագանի անցած մյուս ընդդիմադիրների դաշտում է»,- նշեց Թևանյանը՝ կոչ անելով ընդդիմադիր մյուս ուժերին վեր կանգնել անձնական ամբիցիաներից և սկսել երկխոսություն․ «Մենք էլ պատրաստ ենք միջնորդի դեր ստանձնել և երաշխավորը դառնալ այն պայմանավորվածությունների, որոնք կարող են ձեռք բերվել»,- ասաց նա։
Նշենք, որ «Մայր Հայաստան» դաշինքի թեկնածուն Գյումրիում Կարեն Սիմոնյանն է, նրանք, ըստ նախնական արդյունքների, հավաքել են 2844 ձայն և ավագանիում կունենան 2 մանդատ։
Հիշեցնենք՝ ընդդիմադիր ուժերից առավելագույն ձայները Գյումրու նախկին քաղաքապետ Վարդան Ղուկասյանինն են, նա հավաքել է 9537 ձայն։