«Տավուշում հաստատված արցախցի 780 ընտանիքներից ոչ մեկը չի օգտվել բնակապահովման ծրագրից»․ Ոսկան Սարգսյան

Տավուշում հաստատված արցախցի 780 ընտանիքներից ոչ մեկը չի օգտվել բնակապահովման ծրագրից
Տավուշի մարզպետ Հայկ Ղալումյանին տեղեկատվական հետևյալ հարցումն եմ արել․ «Տավուշի մարզի խորհրդի 2024թ. հունիսի 24-ի նիստում քննարկվել է Լեռնային Ղարաբաղից բռնի տեղահանվածների բնակապահովման ծրագիրը, հարցի զեկուցողն է եղել Տավուշի մարզպետի աշխատակազմի տարածքային կառավարման և տեղական ինքնակառավարման հարցերի վարչության պետ Աղաբեկ Գալստյանը։ Այդ ծրագրով մինչ այժմ ի՞նչ աշխատանքներ են իրականացվել, 2025թ, մարտի 24-ի դրությամբ Արցախից բռնագաղթած քանի՞ ընտանիք է Տավուշում բնակարանով ապահովվել»։

Մարզպետարանից պատասխանել են․«Վերոհիշյալ ծրագրի իրազեկման նպատակով բազմաթիվ այցելություններ են կատարվել համայնքներ և տեղերում իրազեկման հանդիպումներ են տեղի ունեցել տվյալ համայնքներում բնակվող Լեռնային Ղարաբաղից բռնի տեղահանվածների հետ։ Դեռևս ոչ մի ընտանիք չի օգտվել ծրագրից»։
Տավուշի մարզում սեփական բնակարան չունենալը այն հիմնական պատճառներից է, որը բռնագաղթած արցախցիներին ստիպել է հեռանալ Տավուշից։
Տավուշի մարզպետարանի տվյալներով՝ 2023թվականի աշնանը Արցախից բռնագաղթածներից Տավուշի մարզում բնակություն է հաստատել 2970 անձ (780ընտանիք): 2025 թվականի հունվարի 8-ի դրությամբ՝ մարզում եղել է Արցախից բռնի տեղահանված 564 ընտանիք (1920 անձ), այդ ընթացքում Տավուշից հեռացել է 216 ընտանիք, 1050 անձ»։