«Արցախը եղել է պայքարի խորհրդանիշ, բայց այսօր փորձում են վերախմբագրել պատմությունը»․ Էրիկ Բեգլարյան

Արցախի փաստաբանների պալատի նախագահ Էրիկ Բեգլարյանի ֆեյսբուքյան գրառումը. «Հայ ազգը արցախցուն Արցախ է պարտք, իսկ հային՝ հայրենիք։
Այս խոսքերը գիտեմ, որ շատերի մոտ զայրույթ են առաջացնում, բայց մյուս կողմից՝ հայրենասիրություն։ Ոմանք գուցե փորձեն այլ կերպ ընկալել այս միտքը, սակայն այն ունի մի անժխտելի ճշմարտություն․ մենք պատասխանատվություն ենք կրում մեր պատմության, մեր հողի, մեր եղբայրների ու քույրերի համար։
Եկեք վերհիշենք, թե քանի տարի է արցախցին ապրել անընդհատ վտանգի մեջ՝ հավատալով, որ հայ ազգը երբեք չի թողնի Արցախը թշնամուն, որ հայ ժողովուրդը, իր արյամբ ու հավատքով, մշտապես պաշտպանելու է հայկական Արցախը։ Տարիներ շարունակ Արցախը եղել է հայության պայքարի խորհրդանիշը, իսկ արցախցին՝ այդ պայքարի առաջամարտիկը։ Բայց այսօր որոշ մարդիկ փորձում են վերախմբագրել պատմությունը, փորձում են աշխարհին այլ պատկեր ներկայացնել, հայտնելով, որ Արցախը Ադրբեջան է։ Եվ այդքանը դեռ քիչ է՝ նրանք նաև ատելություն են սերմանում արցախցիների նկատմամբ, նրանց մեղադրում, զրպարտում, փորձում հավատացնել, թե արցախցին չի կռվել, զոհեր չեն եղել, թե նրանք խուսափել են պատերազմից։
Նման մարդիկ պետք է հասկանան, որ 44-օրյա պատերազմի ընթացքում հազարավոր արցախցիներ իրենց կյանքը տվեցին հանուն հայրենիքի։ Եթե համեմատենք Հայաստանի բնակչության հետ, ապա պարզ կդառնա, որ Արցախը Հայաստանի ժողովրդից համեմատաբար երեք անգամ պակաս զոհ է տվել, սակայն եթե հաշվի առնենք, որ արցախցիները քանակով 30 անգամ պակաս էին, ապա նրանց զոհաբերությունը հերոսական է։
Մի՛ սադրեք, մի՛ փորձեք բաժանել հայ ազգին։ Պատմությունն իր տեղն ու ժամանակն ունի, և մի օր բոլոր ճշմարտությունները ի հայտ կգան։ Պարզապես հիշեք, որ վերջին պատերազմում արցախցիները մենակ էին կռվում, և այդ մենակությունը միայն նրանց չէր՝ այն հայ ժողովրդի բաց վերքն էր։
Հույս ունեմ, որ մի օր հայ ազգը կհամախմբվի՝ գոնե եղածը պահելու համար։ Որովհետև հայրենիքը կորսվում է, երբ մարդիկ դադարում են հավատալ նրա պաշտպանության անհրաժեշտությանը։ Եվ մենք իրավունք չունենք թույլ տալու, որ դա կրկնվի»։