«Վստահ եմ՝ ոչ ոք Գյումրիի քաղաքապետի թեկնածուների ծրագրերը չի կարդացել»․ Կարեն Հեքիմյան

Հասարակական գործիչ Կարեն Հեքիմյանի ֆեյսբուքյան գրառումը. «Ի՞նչ ծրագիր ունի Գրիգորյան Մարտունը, կամ՝ Ղուկասյան Վարդանը, կամ՝ մյուսները: Եթե նրանք ծրագրեր ունեն, ապա այդ ծրագրերն ինչո՞վ են իրարից տարբերվում: Ավելին՝ եթե մի պահ մտովի տարանջատենք Մինասյան Սարիկին ՔՊ-ից կամ Փաշինյան Նիկոլից, ապա ինչո՞վ է նրա ենթադրյալ ծրագիրը տարբերվում մնացածների ծրագրերից: Ցավոք, որևէ մեկին, որևէ ծրագիր չի հետաքրքրում:
Պարադոքսն այն է, որ Հայաստանի բնակիչներն այդպես էլ չսովորեցին ծրագիրն ընտրել: Վստահ եմ՝ Գյումրիի քաղաքապետի թեկնածուներից յուրաքանչյուրն ունի ինչ-որ բան գրած (ենթադրյալ ծրագիր), սակայն համոզված եմ, որ որևէ մեկը (քիչ բացառությամբ) այդ գրվածը չի կարդացել: Հայաստանի բնակիչների զգալի մեծամասնությունը կարդալ չի սիրում: Օրինակ՝ մեզանից քչերն են կարդում բանկի ապառիկի կամ կապի օպերատորի կողմից մեզ հրամցված պայմանագրերը: Հավատացնում եմ՝ եթե կարդանք, ապա դժվար թե ստորագրենք: Նույնը՝ Գյումրիի քաղաքապետի թեկնածուների դեպքում: Եթե Հայաստանի բնակիչներն, ընտրության գնալուց առաջ, լարեն իրենց հիշողությունը, կարդան թեկնածուների գրածները և համադրեն այդ ամենը, ապա և՛ Հայաստանը, և՛ Գյումրին, և՛ Հայաստանի բոլոր բնակավայրերը արժանապատիվ ղեկավարներ կունենան:
Չեմ կարծում, որ տեսանելի ապագայում Հայաստանի միջին վիճակագրական բնակիչը կփոխվի: Սակայն, պետք է ինչ-որ բանից սկսել: Սկսեք գոնե բանկերի ապառիկների պայմանագրերը կարդալուց»։