«Կառավարման համակարգում ոչ թե կոմպետենտ, այլ քաղաքականապես հարմար անձինք են»․ Վիտալի Մանգասարյան

«Հենակետ» վերլուծական կենտրոնի ղեկավար Վիտալի Մանգասարյանի ֆեյսբուքյան գրառումը․ «Կադրային ճգնաժամի պատասխանատուն
Նիկոլ Փաշինյանը հայտարարում է, որ Հայաստանում խորը կադրային ճգնաժամ է, և ոչ մի պաշտոնյա իր տեղում չէ։ Սա ակնհայտորեն մտահոգիչ իրողություն է, քանի որ պետական կառավարման որակն ուղղակիորեն կախված է այն մարդկանցից, ովքեր ստանձնում են ղեկավար պաշտոնները։ Սակայն երբ այսպիսի հայտարարություն է անում երկրի ղեկավարն ինքը, տրամաբանական հարց է առաջանում՝ ո՞վ է պատասխանատու այս իրավիճակի համար, եթե ոչ հենց այն մարդը, ով արդեն յոթ տարի ձևավորում է այդ կադրային քաղաքականությունը։
Անշուշտ, որևէ երկրի ղեկավար չի կարող ի սկզբանե իմանալ ամեն ինչ, սակայն նրա հիմնական պարտականություններից մեկն է ապահովել կառավարման համակարգի շարունակական զարգացումն ու կատարելագործումը։ Փաշինյանի խոսքերով՝ ամեն հաջորդ օր պետք է իմանալ ավելին, քան նախորդ օրը, սակայն եթե դա իսկապես տեղի ունենար, ապա կադրային ճգնաժամը պետք է մեղմանար, ոչ թե խորանար։ Փաստացի, ստեղծված իրավիճակը վկայում է, որ կառավարումը դարձել է փորձարկումների և սխալների անվերջանալի շղթա, որտեղ սխալներն ավելի շատ են, քան դասերը։
Վերջին տարիներին Հայաստանը բախվել է լրջագույն մարտահրավերների՝ պատերազմներ, տարածքային կորուստներ, անվտանգային խնդիրներ, տնտեսական անորոշություն։ Այս բոլոր ճգնաժամերում կադրային քաղաքականության ձախողումը վճռորոշ դեր է խաղացել։ Փոխանակ կառավարման համակարգը ամրապնդելու և արդյունավետություն ապահովելու՝ իշխանությունը առաջնորդվել է լոյալության սկզբունքով՝ նշանակելով ոչ թե կոմպետենտ, այլ քաղաքականապես հարմար անձանց։
Այս մոտեցման հետևանքները տեսանելի են ամենուր՝ արտաքին քաղաքականությունից մինչև պաշտպանության համակարգ։ Երբ յուրաքանչյուր հաջորդ քայլն ավելի վատ է, քան նախորդը, դա նշանակում է, որ պետական կառավարումը վերածվել է ցիկլային անկման։ Սա վկայում է ոչ թե պարզապես կադրային ճգնաժամի, այլ կառավարման համակարգի փլուզման մասին։
Հ.Գ
Ինչպես կասեր կառավարման համակարգից շատ հեռու գտնվող մեկը՝ ստեղծված իրավիճակի համար մեղավոր է մեկ մարդ, և այդ մեկ մարդը դու ես, Նիկոլ»։