«Որպեսզի սպառնալիքը դառնա քրգործ, պետք է լինի իրական, չափելի»․ Սրբուհի Գալյան

«Ֆեյսբուքում մարդիկ էմոցիոնալ են արտահայտվում․ ո՞րն է այն գիծը, որ կարող են դատել վիրավորանքի ու սպառնալիքի համար»,- ԼուրջCast-ի եթերում դիմելով ՀՀ արդարադատության նախարար Սրբուհի Գալյանին՝ հարցրեց հաղորդավար Սերգեյ Սարգսյանը։ «Քրեորեն հետապնդելի արարք է սպանության սպառնալիքը, առողջությանը ծանր վնաս պատճառելու սպառնալիքը․․․ Սպառնալիքը որպեսզի դառնա քրգործ, պետք է լինի իրական, չափելի։ «Կսպանեմ», «գլուխդ կջարդեմ»․․․ մի քիչ մեր մենթալիտետի մեջ կա, տղայական խոսակցությունների ժամանակ ինչ ասես՝ կարող են իրար ասել, ինչը ցանկալի չէ, բայց ամեն դեպքում, ինչ-որ կետում դրանք պետք է լինեն շոշափելի, որպեսզի խոսենք քրգործի մասին»,- ասաց նախարարը։ Ինչ վերաբերում է վիրավորանքին, Գալյանի խոսքով՝ մարդը, ում հասցեին վիրավորական արտահայտություն են անում կամ զրպարտում, կարող է հայց ներկայացնել դատարան ու պահանջել ոչ նյութական վնասի հատուցում, որպեսզի տվյալ անձը ներողություն խնդրի։