«Բարսելոնայի ու Ռեալի ֆանատներն այնքան իրար չեն ատում, որքան ընդդիմադիր ճամբարները»․ Արմեն Աշոտյան

«ԱԳՆ կոչվող հիմնարկը հերթական անառակաբարո գործողությունն է կատարել՝ թելելով Նիկոլ Փաշինյանի կողմից վարվող էրդողանաալիևյան քաղաքականությունը»,- դատական հերթական նիստից հետո լրագրողների բլից հարցերին ի պատասխան՝ ասաց ՀՀԿ փոխնախագահ Արմեն Աշոտյանը՝ անդրադառնալով ԱԳՆ-ի հայտարարությանը։

Նշենք, որ ԱԳՆ-ն հայտարարել էր, թե՝ «ԼՂ լուծարման վերաբերյալ հրամանագրի հրապարակումից հետո ԼՂ բնակիչների իրավունքների հարցը դուրս է եկել ՀՀ և Ադրբեջանի հարաբերությունների կարգավորման օրակարգից»։

Աշոտյանի կարծիքով՝ սա այն հարցն է, որ նաև դրսում պետք է հնչեցնել, լսեցնել, որ «Նիկոլը և իր ԱԳՆ-ն չեն արտահայտում հայ ժողովրդի և ՀՀ-ի կարծիքը»։
Աշոտյանը նաև ներողություն խնդրեց հասարակության առողջ հատվածից, որին տհաճ է հետևել ներընդդիմադիր գզվռտոցին․ «Մեզ էլ է շատ տհաճ, բայց երբ մեզ վրա հարձակվում են, պաշտպանվելը պարտականություն է, ոչ թե հաճույք։ Հասկանում եմ մարդկանց զարմանքը, թե Նիկոլին թողած՝ իրար միս են ուտում։ Մեր միսն են ուզում ուտել, մենք ընդամենը չենք թողնում, բավ է, շատերը կերան, էլ ոչ ոքի մեր մսից չի հասնելու»,- ասաց Աշոտյանը՝ նշելով, որ խնդիրը տարանջատում օպերացիայի մեջ չէր, որ իրենց դեմ սկսվեց, այլ խնդիրը պառակտում օպերացիայի մեջ է․ «Բարսելոնայի ու Ռեալի ֆանատներն այնքան իրար չեն ատում, որքան էս երկու ընդդիմադիր ճամբարները՝ մոռանալով, որ մենք նույն առաջնությունում ենք խաղում, որտեղ առաջին հորիզոնականում Թուրքիայի ազգային հավաքականն է»,- ասաց Աշոտյանը։