«Ողորմի իր տատիկին». Արամ Հովհաննիսյանը` հուղարկավորության շտապող քաղաքացուն ասֆալտին փռելու մասին

«Իսկ դուք ինչպես եք գնահատում, երբ պետական արարողակարգով երկրի ղեկավար է անցնում, պարեկները ծառայողական պարտականությունն են կատարում, վարորդը ձայնայնին ազդանշան է տալիս»,- ԱԺ-ում լրագրողների հետ զրույցում այսպես արձագանքեց ՀՀ ոստիկանապետ Արամ Հովհաննիսյանը՝ պատասխանելո հարցին, թե ինչպես է գնահատում պարեկների կողմից վարորդին բռնի ուժով մեքենայից բերման ենթարկելու միջադեպը։

Հարցին, թե որքան ժամանակ կարող էին պարեկները փակ պահել ճանապարհը, ոստիկանապետը չցանկացավ պատասխանել։

Պատասխանելով լրագրողի դիտարկմանն այն մասին, որ վարորդը ձայնային ազդանշան է տվել, որովհետև շտապում էր հասնել տատիկի հուղարկավորությանը, ոստիկանապետը քմծիծաղով նշեց․ «Ողորմի իր տատիկին»։

Արամ Հովհաննիսյանի խոսքով՝ մյուս պարեկը չի հարվածել միջադեպը նկարել ցանկացող քաղաքացուն։

«Ծառայողական քննությունը թող պարզի, այս պահին դրա հետ կապված բան չասեմ»,-նշեց ոստիկանապետը։