Բողոքի ակցիա՝ կնոջ սպանության մեջ մեղադրվող Նարեկ Սարգսյանին ազատ արձակելու պահանջով

Այսօր Կառավարության շենքի դիմաց բողոքի ակցիա են իրականացրել Մրգավետ գյուղի բնակիչ Նարեկ Սարգսյանի հարազատները, ընկերները։ Նրանք պահանջում էին ազատ արձակել և արդար դատավարություն անցկացնել համագյուղացու նկատմամբ։
Հիշեցնենք՝ Նարեկ Սարգսյանը մեղադրվում է 2022 թվականի մայիսին կնոջը՝ ԵՊՀ դասախոս Տաթևիկ Աբրահամյանին երեք տարեկան երեխայի աչքի առաջ խեղդամահ անելու մեջ։
Հայտնել էինք, որ օրերս Շենգավիթի դատարանում նիստի ժամանակ իրավիճակը լարվել է, երբ դահլիճում ներկա մի տղամարդ հայտարարել է, որ ինքն է սպանել Տաթևիկ Աբրահամյանին։

Նիստն ընդմիջվել է, իսկ այդ ընթացքում հայտնի է դարձել, որ դատական կարգադրիչներից մեկը մահացել է։

«Նիստերի դահլիճում գտնվող տղամարդկանցից մեկը հայտարարել է, թե իրականում ինքն է սպանել Տաթևիկ Աբրահամյանին, ապա՝ դիմել փախուստի, ինչից հետո իրավիճակը նիստերի դահլիճում գերլարվել է, անգամ դատական կարգադրիչը, որը կարգավորում էր նիստերի դահլիճը, մահացել է ՝ սրտի կանգից»,- այս մասին գրել էր «Փաստինֆո»-ն։

Այսօր բողոքի ակցիայի ժամանակ Նարեկ Սարգսյանի հարազատները պահանջում են հանդիպում Նիկոլ Փաշինյանի հետ․ «Մենք ցանկանաում ենք բոլոր նյութերով հիմնավորել, որ Նարեկ Սարգսյանին ապօրինաբար պահում են անազատության մեջ։ Մենք փաստացի մի իրավիճակում ենք, որ դատարանում անձը կարող է խոստովանել, որ կատարել է սպանություն, ու դրանից հետո ոչ միայն նրան ազատ են արձակում, այլև որևէ գործողություն չի իրականացվել։ Մինչ այս պահը վարույթ նախաձեռնելու որոշում չենք ստացել»,- ասաց փաստաբան Աննա Ծառուկյանը։