«Այսօր առավել, քան երբևէ ռազմական գործողությունների վերսկսման վտանգը մեծ է»․ Կարեն Միրզոյան

«Պատերազմն իրականում չի դադարել, շարունակվում է հիբրիդային պատերազմը, բայց չի բացառվում նաև ռազմական միջոցների կիրառումը»,- «Նյուզ»-ի հետ զրույցում այս տեսակետը հայտնեց Արցախի նախկին արտգործնախարար, արտակարգ և լիազոր դեսպան Կարեն Միրզոյանը։

«Իլհամ Ալիևը հայտարարում է, որ ռազմական գործողությունների հավանականություն կա, բայց խորամանկություն է անում՝ փորձելով այդ գործողությունները սկսելու պատասխանատվությունը դնել Հայաստանի վրա»,- նշեց Միրզոյանը՝ ընդգծելով, որ այսօր առավել, քան երբևէ ռազմական գործողությունների վերսկսման հնարավորությունը մեծ է։

Նրա դիտարկմամբ՝ դրա վկայությունն են ոչ միայն Ալիևի ու Ադրբեջանի այլ պաշտոնյաների հայտարարությունները, այլև թեկուզ այն փաստը, որ Ադրբեջանը շարունակում է սպառազինությունների գնումը, ծավալները գնալով աճում են։

«Ավելին՝ Ադրբեջանում հատուկջոկատայինների զորավարժություններ են իրականացնում․ մոտավորապես նույն սցենարով զորավարժություններ իրականացրել են նաև 2020թ․ պատերազմի նախօրեին։ Դրան գումարած այն, որ անկայուն իրավիճակ է ամբողջ տարածաշրջանում, կարող է պարարտ հող ստեղծվել ռազմական գործողությունների վերսկսման համար»,- նշեց Միրզոյանը՝ հավելելով, որ հրատապ է այն հարցը, թե ինչ են անում ՀՀ իշանություններն այդ հնարավոր վտանգը չեզոքացնելու համար։