«Ինչո՞ւ է աղմկում Փաշինյանը»․ Նիկողոս Հովհաննիսյան

«Հայաստան» դաշինքի անդամ Նիկողոս Հովհաննիսյանի ֆեյսբուքյան գրառումը․ «Ինչո՞ւ է աղմկում փաշինյանը, ինչո՞ւ են որոշել «կրթել» մարդկանց:
Դեռ ոչ հեռավոր 2018թ. մայր ԲՈՒՀ-ի դիպլոմը հրապարակում և հրապարակային, քծնանքով ու զազրելի շողոքորթությամբ հանձնվեց մեկին, ով դագաղներով ու մարդկանց «ընտանիքներ մտնելով» եկավ իշխանության, և այդ օրվանից ի վեր՝ ԲՈՒՀ-ը իշխանության համար դարձավ սովորական մի շենք, որտեղ հենց այնպես՝ առանց կրթվելու, կարող է «թղթի կտոր» տրամադրել։ 2018-2025թթ կրթական ցենզն այնքան իջավ ու հավասարվեց «շրիշակի» մակարդակի, որ այլևս էական չէր, թե պաշտոն ու բարձր դիրք ունենալու համար անհրաժե՞շտ է կրթությունը, թե՝ ոչ։ Ոչ մի ատելություն կամ որևէ նսեմ վերաբերմունք չունենալով՝ ինչ-ինչ պատճառով բարձրագույն կրթություն չունեցողների նկատմամբ, նշեմ, որ այնուհանդերձ պարտադիր է, որ գոնե պաշտոնյան ունենա դա։ Նրանք հասան իրենց նպատակին՝ տգետներին նշանակելով բարձր պաշտոնների, ցույց տալով անկիրթ-անտակտ մասսաներին, որ իրենք կարող են երկիր ղեկավարել՝ հայհոյելով, վիրավորական բառեր օգտագործելով, ու շարքային փողոցայինի պահվածք ունենալով։ Որոշ ժամանակ անց՝ գիտակից հանրության խելացի ճնշմանն արդյունքում սկսեց փոխվել այդ մտածելակերպը մարդկանց մոտ, ու նորից սկսվեց «մերժվել» անկիրթ պաշտոնյան։ Եվ ահա՝ սկսվեց «կրթությունը նորաձև է» անիմաստ շոուն, որ առաջին հայացքից թվում է անմեղ մի բան, բայց արի ու տես, որ այնտեղ հավաքվում են մարդիկ՝ այսպես ասած, ապագա «մենեջերներ», որոնք կամ փորձում են կայանալ՝ այնտեղ լինելով, կամ՝ ունեն այնտեղից «փրկության կարիք»։ Նայելով մասնակից-«մենեջերներին» հասկանում ես, որ այս շոուն ունի մեկ նպատակ՝ ջնջել իրական, հայեցի կիրթ մտածելակերպը՝ եկող սերնդին տալ թեզեր՝ իրենց բերած, «նոր Հայաստանի» վերաբերյալ։ Այս է վկայում նաև կառավարության նիստերի «կրկեսային» մակարդակը»։