«Հանրային ճնշումը կարող է ազդեցություն ունենալ»․ Արտակ Բեգլարյան

«Պետք է հանրային ճնշում լինի, քանի որ հակառակ դեպքում շատերը մեկնաբանում են, թե Արցախի էջը փակված է և բոլորը մարսել են Արցախի ժողովրդի հայրենազրկումը։ Ի դեմս ԱԳՆ-ի՝ ՀՀ կառավարությունը համար մեկ պատասխանատուն է, որպեսզի Արցախի էջը չփակվի։ Քանի կա Արցախի ժողովուրդ, կա նրանց իրավունքների պաշտպանության խնդիր»,- ԱԳՆ-ի դիմաց ընթացող բողոքի ակցիայի ժամանակ լրագրողների հետ զրույցում ասաց Արցախի նախկին ՄԻՊ Արտակ Բեգլարյանը։ «Եթե նայենք կառավարության գործողություններին, իհարկե, ոչ մի սպասելիք չկա, բայց տեսնում ենք, որ հանրային ճնշումը կարող է որևէ ազդեցություն ունենալ»,- ասաց Բեգլարյանը։
Լրագրողի դիտարկմանը, թե արդյո՞ք այս փոքրաթիվ ակցիան կարելի է հանրային ճնշում համարել, Բեգլարյանը պատասխանեց․ «Եկեք քանակով չկողմնորշվենք, այստեղ ենք ի շարունակություն մարտի 29-ի մեծ հանրահավաքի։ Այդ հանրահավաքը որոշակի արդյունք տվել է, գործնականում իշխանությունները որոշ առաջարկներ են արել, զիջումներ և ընդառաջ քայլեր։ Եվ կարողացել ենք հանրային դաշտում օրակարգ վերադարձնել Արցախի ժողովրդի իրավունքների պաշտպանության հարցերը»,- ասաց Բեգլարյանը։ «Իսկ ինչո՞ւ են արցախցիները խուսափում օրվա իշխանությունների հեռացման հարց բարձրացնել» հարցին ի պատասխան՝ նշեց․ «Կաշկանդող հանգամանք չկա, ուղղակի Արցախցիների իրավունքների պաշտպանության խորհրդի օրակարգը ներառում է ժողովրդի իրավունքների հարցեր, իշխանափոխության հարց չի ներառում»։