ԵՄ ընկերությունները ցանկանում են հնարավորինս շուտ ավելացնել ռուսական գազի ներմուծումը. Reuters

Միացյալ Նահանգների և Եվրոմիության միջև սրված առևտրային պատերազմի ֆոնին, եվրոպական խոշոր էներգետիկ ընկերությունները ցանկանում են զգալիորեն ավելացնել ռուսական գազի գնումները, հայտնում է Reuters-ը:

Ռուսաստանից էներգիայի ներմուծումը բարձրացնելու ցանկությունն սկսել է ուժգնանալ, քանի որ վախ կա, որ Եվրոպան կդառնա չափազանց կախված ամերիկյան գազից:

Ֆրանսիական Engie ընկերության ղեկավար Դիդիե Օլլոն լրատվականի հետ զրույցում նշել է, որ եթե ողջամիտ խաղաղություն հաստատվի Ուկրաինայում, ապա կարող են քննարկել Ռուսաստանից Եվրոպա մատակարարումների ծավալը տարեկան 60-70 միլիարդ խորանարդ մետրի հասցնելու հարցը:

2022 թվականին ԵՄ-ն հայտարարեց 2027 թվականին ռուսական գազի ներմուծումը դադարեցնելու նպատակադրվածության մասին, բայց արդեն երկու անգամ հետաձգել է դա իրագործելու ծրագրի հրապարակումը, հիշեցնում է Reuters-ը:

Աղբյուրը նաև նշում է, որ ռուսական էժան գազի խիստ կարիք ունեն նաև գերմանական ձեռնարկությունները: