«Զգուշացնում եմ՝ չափերը չանցնեն»․ Ալեն Սիմոնյանը՝ ընդդիմությանը

Լրագրողների հետ զրույցում ԱԺ նախագահն անդրադառնալով այսօրվա ծեծկռտուքին՝ ասաց․ «Պատգամավորի ելույթի ժամանակ դահլիճում ՀՅԴ ներկայացուցիչների մեջ խոսակցություն էր գնում, արձագանքեցի, ասացի՝ չլուծված հարց ունե՞ք իրար հետ, Արծվիկ Մինասյանն ասաց՝ ես էլ կարամ միկրոֆոնը միացնեմ, խոսեմ, բայց չեմ անում, ես խնդրեցի նրան նստել, ի պատասխան Գառնիկ Դանիելյանն ասաց՝ մի նստիր, ասացի՝ դե լավ, ուրեմն մի նստիր, հետո Իշխան Սաղաթելյանը սկսեց դահլիճից բղավել, ստացավ իր պատասխանը, տեղի ունեցավ ընդհարում»։ Սիմոնյանը շարունակեց․ «Էս ամեն ինչն արվում է նրա համար, որ վաղվա միջոցառմանն ավելի շատ մարդ գնա, հետո դրսից այլ դաշնակցականներ են եկել, պետք է աշխատանք ցուցադրվի, թե իրավիճակը լարված է»։ ԱԺ նախագահի խոսքով՝ ընդդիմության նպատակը՝ իրենց գոյությունը դահլիճում արդարացնելն է․ «Բայց զգուշացնում եմ՝ չափերը չանցնեն, պատասխանը տեղում է լինելու՝ ընտրության միջոցով, վերաբերմունքով, արձագանքներով»։