«Ցեղասպանության ուրացումը բերելու է նրան, որ ուրացողներն են մոռացվելու ժողովրդի կողմից»․ Ռոբերտ Քոչարյան

«Փաստորեն, կրել ենք ծանր պարտություն պատերազմի ժամանակ, և այս իշխանությունն այդ պարտությունը անընդհատ, շարունակական մի պրոցեսի է վերածել՝ անընդհատ ինչ-որ բան զիջել, ինչ-որ բանից հրաժարվել»,- այս մասին այսօր Ծիծեռնակաբերդի հուշահամալիրում լրագրողների հետ զրույցում նշեց ՀՀ երկրորդ նախագահ Ռոբերտ Քոչարյանը:

«Ուղղակի մաշեցնող մի երևույթ է մեր ժողովրդի համար։ Իսկապես շատ ծանր և մաշեցնող է: Միգուցե նաև այս ֆոնի վրա Ցեղասպանության ուրացումը շատ ավելի ծանր ընկալում է ստանում շատ-շատերի մոտ»,- նշեց Քոչարյանը՝ ընդգծելով, որ Հայաստանի արտաքին քաղաքականության օրակարգի մեջ այդ հարցը ներառողը հենց ինքն է եղել, և իր պաշտոնավարման ժամանակաշրջանում ամենից շատ երկրներն են ճանաչել Հայոց ցեղասպանությունը:

ՀՀ երկրորդ նախագահի դիտարկմամբ՝ Անկախության հռչակագրից հրաժարումը և Ցեղասպանության ուրացումը բերելու է նրան, որ ուրանալու են այն մարդկանց, որոնք փորձում են դա անել. իրենք են մոռացվելու մեր ժողովրդի կողմից։