«Հայաստանի հանրային խոսույթը շարունակում է մնալ «բոշա-փչացած» մակարդակում»․ Գարեգին Միսկարյան

«Ժողովրդավարական հարթակ» հիմնադրամի տնօրեն Գարեգին Միսկարյանի ֆեյսբուքյան գրառումը․ «Հայաստանի հանրային խոսույթը շարունակում է մնալ «բոշա-փչացած» մակարդակում: Ոչ մի քաղաքական խոսք, ոչ մի հոդաբաշխ տեսիլք ու ապագայի նկարագրություն (2050-ի ֆուտբոլի հավաքականի մասին չի խոսքը):
Սա ոչինչ չասող և ոչ մի տեղ տանող օրակարգ է, որին լծված են իշխանության «համը» տեսածները կամ դրա պատասխանատվության բեռն ընկալող անպատասխանատու պոռոտախոս տգետները, որոնք կյանքում սեփական ուժերով մի հավաբուն չունեն սարքած, էլ չեմ ասում կառավարած (հատուկենտ բացառությունները հաշվի մեջ չեն):
Իսկ նրանք, ովքեր ունակ են ինչ-որ բան փոխել այսօր և այստեղ, կամ քաղաքական չեն ու պասիվ դիտորդի կարգավիճակում հետևում են Հայաստանի սրընթաց անկմանը, կամ հավաքում են ճամպրուկները՝ հեռանալու ավելի անվտանգ ու բարեկեցիկ երկրներ:
Մեզ հետաքրքիր են նրանք, ովքեր կենսափորձ ունեն, ցանկություն ունեն այս վիճակը բեկելու, կարողություն ունեն սովորելու, համակերպված չեն մարմանդ կրակի վրա եփվող գորտի կարգավիճակի հետ, համարձակ են և վճռական»։