«ԱՄՆ-ի զանգերը զսպել են Ադրբեջանի ագրեսիվ նպատակները»․ Տաթևիկ Հայրապետյան

«Միշտ ասել եմ, որ Ադրբեջանը լրջորեն վնասում է Միացյալ Նահանգների իմնիջն այս տարածաշրջանում՝ նրանց խոսքը արժեզրկելով»,- «Ֆակտոր»-ի եթերում նշել է ադրբեջանագետ Տաթևիկ Հայրապետյանը։ Նրա խոսքով՝ ԱՄՆ նոր վարչակազմը պետք է տարբերվի նախորդ վարչակազմից։ «Թրամփի վարչակազմի ներկայացուցիչներն ավելի շատ աչքի են ընկնում ինչ-որ տեղ էքսցենտրիկ, բայց միևնույն ժամանակ բավականին կոշտ խոսույթով։ Ես վստահ եմ, որ երբ Ուոլցի հետ Հաջիևի առաջին զրույցը տեղի է ունեցել, Հաջիևը չի ակնկալել, որ իրենց առաջ խնդիրներ են դրվելու։ Իրենց համար անսպասելի է եղել, որ գերիների, պայմանագրի թեման դրվել է սեղանին»,- ասել է ադրբեջանագետը և ընդգծել, որ ԱՄՆ-ի զանգերը որոշակի դերակատարում են խաղացել, որպեսզի առժամանակ Ադրբեջանը զսպի իր ագրեսիվ նպատակները, բայց դա ժամանակավոր բնույթ է կրում։