«Չեմ ցանկանում Արցախի տարածքից դուրս զբաղեցնել որևէ արցախյան պաշտոն»․ Հայկ Խանումյան

«Իմ՝ Արցախի նախագահի պաշտոնում առաջադրվելու մասին լուրը բամբասանք է, ոչ ավելին»,- «Փաստինֆո»-ի հետ զրույցում ասել է Արցախի ՏԿԵ նախկին նախարար Հայկ Խանումյանը։ «Առհասարակ մեր կուսակցությունը արտախորհրդարանական ուժ է, իսկ թեկնածուներին ներկայացնում են խմբակցությունները։ Սամվել Բաբայանի գլխավորած քաղաքական ուժի խմբակցության կողմից իմ առաջադրումը նույնպես բամբասանք է։ Նման քննարկում բացարձակապես երբևէ որևէ մեկի հետ չի եղել։ Ես նման հավակնություններ չունեմ, և չեմ էլ ցանկանում Արցախի տարածքից դուրս զբաղեցնել որևէ արցախյան պաշտոն», – նշել է Խանումյանն ու ավելացրել. «Երբ Արցախը վերադարձնելու հնարավորություն ստեղծվի և Արցախի պետական մարմինները գործեն Արցախի տարածքում՝ այդ ժամանակ կարող եք այդ հարցը ուղղել»։

Հարցին՝ ինչպես է վերաբերվում Արցախի նախագահի ինստիտուտի պահպանմանը ՀՀ տարածքում, նա պատասխանել է, որ դրանում որևէ խնդիր չի տեսնում։