«Տեղի ունեցածը պլանավորված խոշտանգում է՝ քաղաքական ակցիա իրականացնողների նկատմամբ»․ Վահե Եփրիկյան

«Քննությունը վկայում է հետևյալի մասին՝ փորձ է կատարվում Նոր Նորքի թաղապետի և նրա հանցակիցների գործողությունները պարտակել ՔՕ առավել նվազ պատասխանատվություն նախատեսող հոդվածի՝ ֆիզիկական ներգործության վերաբերյալ հոդվածի տակ։ Թաղապետի և նրա հանցակիցների գործողությունները պետք է որակվեն առնվազն ծանրացնող հանգամանքներով խուլիգանության հոդվածով կամ խոշտանգման հոդվածով, որն ավելի արդարացի կլինի․․․ Բայց վարույթն իրականացնող մարմինը չի բավարարվել իրավական գնահատական տալով Նոր Նորքի թաղապետ Տիգրան Տեր-Մարգարյանի և նրա հանցակիցների գործողություններին, այլ նաև «կոմպենսացնելու» համար Արթուր Չախոյանին և Մեսրոպ Մանուկյանին մեղսագրել է խուլիգանություն կատարելու հոդվածը»,- այս մասին լրագրողների հետ զրույցում նշեց փաստաբան Վահե Եփրիկյանը։

Նրա խոսքով՝ ակնհայտ է, որ խոսքը վերաբերում է բացառապես քաղաքական ակցիային՝ Մանուկյանի և Չախոյանի կողմից, և ի պատասխան դրա՝ ամենաթողության, հովանավորչության, անպատժելիության մթնոլորտում գտնվող պետական պաշտոնյանի կողմից կատարված մի շարք հանցագործություններին՝ ֆիզիկական ներգործությանը, խուլիգանությանը և խոշտանգմանը։

«Պաշտոնատար անձի կողմից խոշտանգումը տեղի է ունեցել բոլորի աչքի առաջ՝ ուղիղ եթերում։ Ներկայացրել եմ հաղորդում հանցագործության մասին, մինչ այս պահը այդ մասով որևէ որակական պատասխան չունեմ»,- նշեց փաստաբանը՝ հավելելով՝ մեր իրականության մեջ կարելի է ասել, որ իրավաբանությունը ևս քաղաքական է։

«Իրավաբանությանը մոտ կանգնած ցանկացած անձ կարող է տեսնել, որ Չախոյանի և Մանուկյանի արարքներում հանցակազմ չկա»,- ընդծեց Եփրիկյանը։ Նա նաև կարծիք հատնեց, որ տեղի ունեցածը հստակ պլանավորված խուլիգանություն է և խոշտանգում՝ քաղաքական ակցիա իրականացնող անձանց նկատմամբ։