«Ինչո՞ւ ոստիկանությունը չարձագանքեց թաղապետի հայհոյանքներին»․ հարց՝ Արմեն Մկրտչյանին

«Ինչո՞ւ ոստիկանությունը չարձագանքեց այն ժամանակ, երբ հրապարակվեց Նոր Նորքի թաղապետի սեռական բնույթի հայհոյանքը։ Գուցե այդ ժամանակ չհաջորդեր այն, ինչ տեղի ունեցավ»,- ԱԺ-ում լրագրողները հարցն ուղղեցին ՀՀ ներքին գործերի նախարարի տեղակալ Արմեն Մկրտչյանին՝ անդրադառնալով Նոր Նորքի թաղապետ Տիգրան Տեր-Մարգարյանի և բլոգեր Արթուր Չախոյանի միջև եղած միջադեպին։ «Գիտեմ, որ քրեական հետապնդում է հարուցված նաև թաղապետի և թաղապետարանի աշխատակիցների նկատմամբ»,- ասաց Մկրտչյանը՝ չհամաձայնելով, որ ոստիկանության արձագանը եղել է ուշացած։ Հարցին՝ ինչո՞ւ բերման ենթարկվեց ծեծվողը, այլ ոչ թե նրան ծեծողները, Մկրտչյանը պատասխանեց․ «Ոստիկանությունն արձագանքում է իր ունեցած տեղեկատվության հիման վրա. տեղում համադրելով, ուսումնասիրելով դրանք՝ որոշում է կայացնում։ Ոստիկանության ծառայողները րոպեներ հետո տեղում են եղել, փորձել են հասարակական կարգը պահպանել, և հավանաբար ուսումնասիրելով ձայնագրությունները, վարույթ է նախաձեռնվել։ Այս պահին չեմ կարող ասել՝ քանի հոգի է ձերբակալվել։ Տեսաձայնագրության մեջ մեկ անձ կա, ով օրինական պահանջին չի ենթարկվել և առաջնահերթ ձերբակալման գործողությունը կատարվել է այդ անձի նկատմամբ»,- ասաց Մկրտչյանը։