«Շանտաժն աշխատեց․ որոշեցին, որ աթոռն ու թալանի իրավունքն ավելի կարևոր են»․ Անդրանիկ Թևանյան

«Պաշտոնանկություն չկա, իսկ մեղադրանք են առաջադրում նաև նրանց, ովքեր ծեծի են ենթարկվել ու կոռուպցիա են բացահայտել»,- «Հայելի» ակումբում ասաց «Մայր Հայաստան» դաշինքի առաջնորդ Անդրանիկ Թևանյանը՝ անդրադառնալով Նոր Նորքի թաղապետարանի միջադեպին և վարչական շրջանի ղեկավար Տիգրան Տեր-Մարգարյանի նկատմամբ մեղմ վերաբերմունքին։ «Երևանի քաղաքապետի լիազորություններն ապօրինաբար ստանձնած Տիգրան Ավինյանի ասածը թաղապետին մոտավորապես այս էր՝ Տիգրան ջան, սիրուն չի։ Այս պատմության ենթատեքստն այն է, որ Երևանի քաղաքային իշխանությունը մազից է կախված․․․ Իրականությունն այն է, որ երեխաների փողերը լափել են, մանկապարտեզի շինարարությունը խայտառակ ձևով են իրականացրել, հետո այդ ամենը կոծկել են բռունցքներով ու դեմագոգիայով»,- ասաց Թևանյանը՝ նշելով, որ Արամ Սարգսյանը շանտաժ է անում Փաշինյանին․ «Արամ Սարգսյանի շանտաժն աշխատեց։ Նա ասում է՝ եթե ես դուրս գամ կոալիցիայից, կա՛մ արտահերթ է լինելու, կա՛մ ընդդիմությունը վերցնելու է իշխանությունը։ Նիկոլ Փաշինյանի հետ նստել, առևտուր են արել, որոշել են, որ աթոռն ու թալանի իրավունքն ավելի կարևոր են, քան ժողովրդավարությունը»,- նշեց Թևանյանը։