«Սահմանային անցակետերում բաժիններ են փակվել, որից հետո թմրաշրջանառության ծավալներն աճել են»․ Ռուստամ Բաքոյանը՝ Արփինե Սարգսյանին

«Մինչև 2024թ․ ապրիլը բոլոր սահմանային անցակետերում գործել է մասնագիտացված ստորաբաժանում թմրամիջոցների դեմ պայքարի գծով՝ ՊԵԿ մաքսանենգության դեմ պայքարի վարչությունում, սակայն կրճատումներ են տեղի ունեցել և 5 սահմանային բաժին և 4 բաժանմունք փակվել է, որից հետո թմրաշրջանառության թիվն աճել է ՀՀ-ում»,- այսօր ԱԺ-ում դիմելով ՆԳ նախարար Արփինե Սարգսյանին, այս մասին նշեց ՔՊ խմբակցության պատգամավոր Ռուստամ Բաքոյանը։

Նախարարն արձագանքեց՝ ընդգծելով, որ Քննչական մարմինների միավորման տրամաբանության մեջ լուծարումներ են եղել, բայց դա միտված է եղել էլ ավելի արդյունավետ նախաքննություն իրականացնելուն։

«ՀՀ-ում այս պահին գործում է 2 քննչական մարմին՝ Հակակոռուպցիոն կոմիտեն և Քննչական կոմիտեն։ 2025թ․ 3 ամիսների ընթացքում իրավապահ համակարգը առգրավել է 173կգ 942 գ տարբեր տեսակի թմրամիջոց։ Իսկ 2024թ․ նույն ժամանակահատվածում առգրավվել է 39կգ թմրամիջոց։ Այսինքն՝ կոնսոլիդացիայի արդյունքում ունեցել ենք արդյունավետության բարձրացում»,- ասաց նախարարը։

Բաքոյանը կարծիք հայտնեց․ «Գուցե 2025 թվականին թմրամիջոցների ծավալներն են շատ եղել, չենք կարող բացառել, որ հենց այդ տրամաբանության մեջ է ավելի շատ բացահայտվել»։