«Նիկոլ Փաշինյանն ու Ռուբեն Ռուբինյանը խախտել են սահմանադրական կարգը»․ Էդգար Ղազարյան

Հասարակական, քաղաքական գործիչ Էդգար Ղազարյանն այսօր պատրաստվում է հանդիպել ԱԺ փոխխոսնակ Ռուբեն Ռուբինյանի հետ․ «Ինձ հետաքրքիր է իր կարգավիճակը, քանի որ իմ տպավորությամբ նա խախտել է ՀՀ Սահմանադրությունը։ Ռուբինյանը հայտարարում է, և ինքն էլ ընդունում է, որ հայ-թուրքական հարաբերություններում հայկական կողմի պաշտոնական բանագնացն է։ Մեր Սահմանադրությամբ օրենսդիր, գործադիր և դատական իշխանությունները հստակ տարանջատված են։ Պարոն Ռուբինյանը օրենսդիրի բարձրաստիճան պաշտոնյա է, իսկ մեր Սահմանադրությամբ արտաքին քաղաքականությունն իրականացնում է կառավարությունը։ Ըստ մեր երկրի օրենսդրության, դիվանագիտական ծառայության մասին օրենքի, քանի դեռ Թուրքիայի հետ չկան դիվանագիտական հարաբերություններ, վարչապետի որոշմամբ պետք է նշանակվեր հատուկ հանձնարարությունների գծով դեսպան, որը պատասխանատու լիներ հայ-թուրքական հարաբերություններում, ինչը որ արվել է Թուրքիայում։ Պարոն Ռուբինյանը իրավասու չի իրականացնել արտաքին քաղաքականություն, բայց Նիկոլ Փաշինյանը հայտարարում է, որ ինքն է նշանակել Ռուբինյանին և նա իրեն է հաշվետու։ Հետևաբար Ռուբինյանը և Փաշինյանը խախտել են ՀՀ սահմանադրական կարգը։ Ուզում եմ իմանալ՝ պարոն Ռուբինյանը իմ հետ հանդիպումից հետո պատրա՞ստ է ինքնախոստովանական ցուցմունքով ներկայանալ ԱԱԾ»,- ասաց Ղազարյանը՝ նշելով, որ Ռուբինյանը պետք է կատարի իր՝ քաղաքացիներին ընդունելու պարտականությունը և հանդիպի իր հետ։