«Հակաքարոզչություն ընդդիմադիր ուժի դեմ․ սա քաղաքական անատամություն է»․ Հենրիխ Դանիելյանը՝ Ռոբերտ Քոչարյանին սատարողներին

ՀՀԿ երիտասարդական կազմակերպության ղեկավար Հենրիխ Դանիելյանի ֆեյսբուքյան գրառումը․ «Ցավով ենք նկատում, թե ինչպես ՔՊ-ականների կեղտոտ քաղաքականությանը զուգահեռ ակտիվացել են նաև Ռոբերտ Քոչարյանին սատարող մեդիա ռեսուրսներն ու խոսափողները, որոնք իրենք էլ չեն թաքցնում, որ ներկայացնում են նրա քաղաքական տեսակետները։ Բայց ակտիվացել են ոչ թե իրենց ինչ ասես ասող ՔՊ-ականների դեմ, այլ Սերժ Սարգսյանի և ՀՀԿ-ի։ Երբ ՔՊ-ականները բացահայտ վիրավորանքներ ու զրպարտություն են ուղղում ձեր հասցեին, դուք լռում եք՝ փոխարենը ձեր ողջ ջանքերն ուղղելով Սերժ Սարգսյանի դեմ՝ նույն մեղադրանքներով, նույն ոճով, ինչ օգտագործում են իշխանական շրջանակները։
Դուք շարունակում եք շրջանառել կեղծ նարատիվներ, տարածել ապատեղեկատվություն, իբր թե ինչ-որ շենքերում բաժնեմասերի, սեփականությունների մասին՝ իրական քաղաքական խնդիրներից հանրության ուշադրությունը շեղելու համար։ Սա ոչ միայն անբարոյական, այլև քաղաքական անատամության դրսևորում է։
Պարզապես խայտառակություն է լինել այնքան վախկոտ ու ապաշնորհ, որ իշխանությանը պատասխանելու փոխարեն ընտրում եք հակաքարոզչություն ընդդիմադիր ուժի դեմ՝ ծառայելով նույն իշխանական օրակարգին, որի հարվածի տակ հաճախ հայտնվում նաև դուք»։